လာအို နိုင်ငံ မှာ ရောက်ရှိနေတဲ့ တရားမဝင် မြန်မာအလုပ်သမားတွေ အပါအဝင် မြန်မာရွှေ့ပြောင်း အလုပ်သမားရေးနဲ့ ပတ်သက်ပြီး စီမံဆောင်ရွက်ပေးနိုင် ဖို့ ဆိုကာ စစ်ကောင်စီ မှ အလုပ်သမားဝန်ကြီးဦးမြင့်နောင်နဲ့ လာအို အလုပ်သမား ဝန်ကြီး တို့ နားလည်မှုစာချွှန်လွှာ (MOU )ရေးထိုးလိုက်တယ်လို့ စစ်ကောင်စီရဲ့ နိုင်ငံပိုင်သတင်းဌာနကနေ ထုတ်ပြန်ထားပါတယ်။
လာအိုနိုင်ငံ၊ ဗီယန်ကျင်းမြို့မှာ အောက်တိုဘာလ ဒုတိယ အပတ် က ပြုလုပ်ခဲ့တဲ့ လာအို-မြန်မာနှစ်နိုင်ငံ ရွှေ့ပြောင်းအလုပ်သမားဆိုင်ရာ ပူးပေါင်းဆောင်ရွက်မှုဝန်ကြီးအဆင့် အစည်းအဝေးအပြီးမှာ နှစ်နိုင်ငံသဘောတူလက်မှတ်ရေးထိုးထားတာဖြစ်တယ်လို့ သိရပါတယ်။
ယခုရေးထိုးတဲ့စာချွန်လွှာအရ နှစ်နိုင်ငံ ကတိကဝတ် ဖြင့် ပုံမှန်အလုပ်သမားများ ရွှေ့ပြောင်းသွားလာခြင်းဆောင်ရွက် နိုင်ဖို့ နှစ်နိုင်ငံ နယ်စပ်ဖြတ်ကျော် အလုပ်သမားတွေကို အထောက်အထား ထုတ်ပေးနိုင်တဲ့ လုပ်ငန်းစဉ်များ ဆောင်ရွက်ရေး၊ ဒေသအတွင်းအလုပ်သမားရေးရာနဲ့ ပက်သက်တဲ့ စိန်ခေါ်မှု တွေကို ပူးပေါင်းဆောင်ရွက် ဖြေရှင်းဖို့ စတာတွေ ဆွေးနွေးခဲ့ကျတယ်လို့ သတင်းထုတ်ပြန်ချက်မှာဖေါ်ပြထားပါတယ်။
လက်ရှိမှာ လည်း လာအိုနိုင်ငံ အတွင်း တရားဝင် သွားရောက်အလုပ်လုပ်ကိုင် နေတဲ့ မြန်မာအလုပ်သမားတွေရှိသလို တရားမဝင် သွားရောက် အလုပ်လုပ်ကိုင်နေသူတွေက ပိုများတယ်လို့ ပြည်ပအလုပ်အကိုင်ရှာဖွေရေးအေဂျင်စီ တွေထံက သိရပါတယ်။
နှစ်နိုင်ငံအစည်းဝေးပြီးနောက်မှာ စစ်ကောင်စီရဲ့ အလုပ်သမားဝန်ကြီး ဦးမြင့်နောင် က ဗီယန်ကျင်းမြို့ကတရားဝင် မြန်မာရွှေ့ပြောင်းအလုပ်သမားတွေရှိတဲ့စက်ရုံတစ်ခုဆီ သွားရောက်ခဲ့ ပြီး အလုပ်သမားတွေရဲ့ လုပ်ခလစာ ၂၅ ရာခိုင်နှုန်းကို မိသားစုဝင်တွေထံ တရားဝင်ဘဏ်စနစ် ဒါမှမဟုတ် ဘဏ်နဲ့ချိတ်ဆက်ထားတဲ့ နိုင်ငံတကာ ငွေလွှဲဝန်ဆောင်မှုတွေကနေ လွှဲပြောင်းပေးဖို့ ပြောခဲ့တယ်လို့သိရပါတယ်။
လာအိုမှာ တရားမဝင်အထောက်အထားနဲ့ နေထိုင်ပြီးစက်ရုံ အလုပ်ရုံ နဲ့ ဈေးအရောင်းဆိုင်တွေမှာ အလုပ်လုပ်ကိုင်နေတဲ့ မြန်မာတွေ ထောင်နဲ့ချီ ရှိသလို လာအိုနိုင်ငံထဲက တရုတ်အထူးစီးပွားရေးဇုန်ထဲကလောင်းကစားရုံတွေနဲ့ ကာစီနိုတွေမှာ တရားမဝင် အလုပ်လုပ်ကိုင်နေသူတွေလည်းရှိတယ်လို့ သိရပါတယ်။
