ထိုင်းနိုင်ငံရှိ မြန်မာအပါအဝင် ရွှေ့ပြောင်းလုပ်သား တွေရဲ့ အထောက်အထားမဲ့နဲ့ နိုင်ငံသားလက်မှတ်မရှိသေးတဲ့ ကလေးများအားလုံး ကို ပညာသင်ကြားခွင့် အတွက် ကျောင်းအပ်လက်ခံပေးဖို့ ထိုင်းပညာရေးဝန်ကြီးက ညွှန်ကြားချက်ထုတ်ပြန်လိုက်ပါတယ်။

 

၎င်း ထုတ်ပြန်ချက်အရ ရွှေ့ပြောင်းအလုပ်သမားတွေရဲ့ ကလေးငယ်တွေဟာ တရားဝင်အထောက်အထားမရှိပေမယ့် မူလတန်းအဆင့်မှ အခြေခံပညာကို သင်ယူခွင့်ရရှိမှာ ဖြစ်ပါတယ်။

 

ယခင်က ထိုင်းနိုင်ငံရှိ အချို့ကျောင်းတွေ နဲ့ဆရာ ဆရာမ တွေက ရွှေ့ပြောင်းလုပ်သားတွေရဲ့ အထောက်အထားမရှိတဲ့ ကလေးတွေ ကို ကျောင်းအပ်လက်ခံဖို့ ငြင်းဆိုတာတွေ ရှိခဲ့ပြီး ယခုညွှန်ကြားချက် ထွက်လာပြီ ဖြစ်တဲ့ အတွက် ၎င်းညွှန်ကြားချက်ကို ပြသပြီး ကျောင်းအပ်နှံခွင့် တောင်းဆိုနိုင်တယ်လို့သိရပါတယ်။

 

""အထက်ကညွှန်ကြားတာကို သေချာလိုက်နာမယ်ဆိုရင်တော့ မြန်မာအပါအဝင်ရွှေ့ပြောင်း လုပ်သားတွေရဲ့သားသမီးတွေ အတွက် အတော်လေး ဝမ်းသာစရာဖြစ်ပြီပေါ့ ထုတ်ပြန်ချက်အတိုင်း ကျောင်းတတ်ခွင့်ရ မရ တော့စောင့်ကြည့်ရမှာပဲ""လို့ ထိုင်းရောက်မြန်မာလုပ်သားအရေးကူညီပေးသူတစ်ဦးကပြောပါတယ်။

 

ထိုင်းနိုင်ငံ တွင် မြန်မာရွှေ့ပြောင်းလုပ်သားတွေ အများပြားရှိတဲ့ မဲဆောက်မြို့နယ်နဲ့ရနောင်း မြို့နယ် တို့မှာ ရွှေ့ပြောင်းလုပ်သားများရဲ့ ကလေးငယ်များ ပညာရေး အတွက် မြန်မာအဖွဲ့အစည်း များက ကိုယ်ထူကိုယ်ထ ပညာရေးကျောင်းများ တည်ထောင်ကာပညာသင်ကြားပေးလျက်ရှိပါတယ်။

 

အခုလို ပညာရေးကျောင်းတွေ တည်ထောင် သင်ကြားပေးရာမှာ အချို့ကျောင်းတွေကို ထိုင်းအာဏာပိုင်တွေက ခွင့်ပြုချက် မရဘဲ သင်ကြား တယ်ဆိုကာ ကျောင်းတွေ ပိတ်ခိုင်းခြင်း ဦးဆောင်လုပ်ကိုင်သူနဲ့ ဆရာ ဆရာမ တွေ ကို ဖမ်းဆီးအရေးယူတာတွေ ပြုလုပ်ခဲ့ပါတယ်။