ထိုင်းနိုင်ငံ ၊စမူပရာကန် မြို့နယ်ရှိ ဆေးဘဲဥ ထုတ်လုပ်တဲ့ အလုပ်ရုံမှာ လုပ်ကိုင်နေတဲ့ မြန်မာလုပ်သား၂၁ဦးရဲ့ လုပ်အားခ ဘတ် လေးသိန်းကျော် ကို ပိုင်ရှင် ဖြစ်သူက ပြန်ပေးခဲ့တယ်လို့ မြန်မာရွှေ့ပြောင်းလုပ်သားတွေကို ကူညီဖြေရှင်းပေးတဲ့ MHAC မဟာမိတ်အဖွဲ့ ဆီက သိရပါတယ်။

 

အဲ့ဒီ အလုပ်ရှင်က မြန်မာလုပ်သားတွေရဲ့ လုပ်အားခ ၅လစာ ကို မပေးတဲ့ အပြင် လုပ်အားခ ရှင်းပေးဖို့ ပြောဆိုတဲ့ မြန်မာလုပ်သား ၁၈ဦး ကို မေလ ၁၈ရက်က ထိုင်းရဲ ခေါ် ဖမ်းဆီး ခိုင်းခဲ့ပါတယ်။ မြန်မာလုပ်သား‌ တွေရဲ့ ရှင်းပြမှုကြောင့် ထိုင်းရဲ တွေ အကြောင်းစုံသိရှိ ပြီး မြန်မာလုပ်သားတွေကို ပြန်လွှတ်ပေးခဲ့တာ ဖြစ်ပါတယ်။

 

မြန်မာလုပ်သားတွေရဲ့ လုပ်အားခ များ ပြန်လည်ရရှိဖို့ MHAC မဟာမိတ်အဖွဲ့နှင့် NUG အစိုးရအလုပ်သမားဝန်ကြီးဌာန တို့က ထိုင်းဥပဒေအတိုင်းဆောင်ရွက်ပေးဖို့ လုပ်ငန်းရှင်ကို မေလ ၁၉ ရက်မှာ အမှုဖွင့်တိုင်ကြားခဲ့တယ်လို့ သိရပါတယ်။

အဲ့ဒီလို တိုင်ကြားခဲ့ပြီးနောက် မေလ ၂၃ ရက်မှာ မြန်မာအလုပ်သမား ၂၁ ယောက်ရဲ့ လစာ ထိုင်းဘတ်ငွေ (၄၀၉၀၇၂) နဲ့အထောက်အထား စာရွက်စာတန်း‌တွေကို လုပ်ငန်းရှင်က ပြန်‌ပေးခဲ့တာ ဖြစ်ပါတယ်။