ခရီးသွားတွေရဲ့ တိုင်ကြားမှုအရ ထိုင်းခရီးသွားရဲတပ်ဖွဲ့ဟာ ကော့ဖငန်ကျွန်းပေါ်ရှိ ရရှားလူမျိုးပိုင်ကားအငှားကွန်ရက်ကိုဝင်ရောက်စီးနင်းဖမ်းဆီးခဲ့ရာမြန်မာနိုင်ငံသား စက်ပြင်ဆရာ၃ဦး ၊အိမ်သန့်ရှင်းရေး၂ဦးပါဖမ်းဆီးခံရခဲ့ကြောင်း ထိုင်းသတင်းဌာနများ ဖော်ပြချက်အရသိရပါတယ်။
ရဲမှူးချုပ်ကြီး ခရစ် ဝါရစ် (Police Major General Krits Warit) ဦးဆောင်ပြီး အောက်တိုဘာ ၂၁ရက်တွင် အဆိုပါလုပ်ငန်းသို့ဝင်ရောက်စီးနင်းခဲ့ခြင်းဖြစ်ပြီး ကား ဆိုင်ကယ်အစီးရေလေးရာနီးပါးနှင့်အတူ ဖောက်သည်ဝန်ဆောင်မှုပေးသူ ရုရှားလူမျိုးတစ်ဦးလုပ်ငန်းကိုစီမံခန့်ခွဲသူ ထိုင်းလူမျိုးတစ်ဦးနှင့်အတူ မြန်မာအလုပ်သမားငါးဦးပါအဖမ်းဆီးခံခဲ့ရခြင်းဖြစ်ပါတယ်။
မြန်မာအလုပ်သမားစက်ပြင်ဆရာတစ်ဦးမှ ဆိုင်ကယ်များကို သူငယ်ချင်းမြန်မာတစ်ဦးထံမှတစ်ဆင့်စျေးပေါပေါဖြင့်ဝယ်ယူခဲ့ကြောင်း ထွက်ဆိုခဲ့သည့်အတွက် အဆိုပါလုပ်ငန်းသည် ခိုးယူထားသောယာဥ်များနှင့်ဆက်စပ်မှုရှိနိုင်သည်ဟုသံသယရှိသဖြင့် သိမ်းဆည်းရမိသောယာဥ်များ၏မူရင်းကိုခြေရာခံနိုင်ရန်အတွက် စုံစမ်းစစ်ဆေးမှုများပြုလုပ်နေကြောင်းသိရပါတယ်။
အဆိုပါကားအငှားကုမ္ပဏီသည် တရားဝင် ဟိုတယ်လိုင်စင်မရှိဘဲ နေ့စဉ် အခန်းအငှားဝန်ဆောင်မှုများ ကိုလည်းပေးနေခြင်းဖြစ်ပြီး ထိုင်းလူမျိုးနာမည်ခံပြီးလုပ်ကိုင်နေတဲ့ လုပ်ငန်း ဟုတ် မဟုတ် စုံစမ်းစစ်ဆေးမှုများလုပ်ဆောင်နေကြောင်းသိရပါတယ်။
