ရန်ကုန်မြို့ရဲ့ လေထုညစ်ညမ်းမှု မှာ အနီရောင်အဆင့်ကို ရောက်ရှိနေတာကြောင့်ပြည်သူတွေ သတိပြုနေထိုင်ကျရန်နဲ့ အပြင်ထွက်ရန် လိုအပ်ပါက နှာခေါင်းစည်းတပ်ရန် မိုးလေဝသနှင့်ဇလဗေဒညွှန်ကြားမှုဦးစီးဌာနဒုတိယညွှန်ကြားရေးမှုးဒေါက်တာကြူကြူစိန် က အကြံပြုတိုက်တွန်းထားပါတယ်။
ဖေဖော်ဝါရီ ၂၄ ရက် နံနက် ၈ နာရီခွဲ IQ Air ရဲ့ ထုတ်ပြန်ချက်အရ ရန်ကုန်မြို့မှာ ကမ္ဘာ့လေထုညစ်ညမ်းမှုအဆင့် ၄ တွင်ရပ်တည်နေပြီး AQI (လေထုအရည်အသွေးအညွန်းကိန်း) မှာ ၂၁၀ တွင်ရှိနေကာနံနက် ၁၁ နာရီမှာတော့ ကမ္ဘာ့အဆင့် ၅ သို့ ရောက်ရှိနေပြီး AQI (လေထုအရည်အသွေးအညွန်းကိန်း) မှာ ၁၈၉ သို့ ပြန်လည်ရောက်ရှိခဲ့တယ်လို့ ထုတ်ပြန်ထားပါတယ်။
လေထုညစ်ညမ်းမှုကြောင့် လေထုအတွင်းမှာပျံ့နှံ့နေတဲ့ အမှုန်တွေရဲ့အရွယ်အစားကလည်း 2.5 micron အောက်ကို ရောက်ရှိနေတာ ဖြစ်တဲ့အတွက် သေးငယ်တဲ့အမှုန်လေးတွေဟာ အသက်ရှူလမ်းကြောင်းကို အလွယ်တကူ ဝင်ရောက်နိုင်ပြီး အသက်ရှူလမ်းကြောင်းဆိုင်ရာပြဿနာတွေကို ခံစားရနိုင်တယ်လို့ဆိုပါတယ်။
ဒါကြောင့် အတတ်နိုင်ဆုံး အိမ်ပြင်မထွက်ဘဲ နေထိုင်ကျဖို့နဲ့ အထူးသဖြင့် သက်ကြီးရွယ်အိုတွေ၊ ကလေးသူငယ်တွေ သတိထားရန် မဖြစ်မနေ ထွက်ရ ရင်ပါက နှာခေါင်းစည်းတပ်ဆင်ကြဖို့ ဒုတိယညွှန်ကြားရေးမှုးဒေါက်တာကြူကြူစိန် က အကြံပြုတိုက်တွန်းထားပါတယ်။
အခုကာလဟာ ခြောက်သွေ့ရာသီဖြစ်တာကြောင့် လေထု ညစ်ညမ်းမှုဖြစ်ပွားလေ့ရှိပြီး အထူးသဖြင့် စက်ရုံတွေ၊ ယာဉ်ယန္တရားတွေ၊ အမှိုက်မီးရှို့တာတွေကနေ ထွက်လာတဲ့ အခိုးအငွေ့တွေကြောင့် မြို့ပြတွေမှာ လေထုညစ်ညမ်းမှု ပိုမိုဖြစ်ပွားကာ ဖေဖေါ်ဝါရီနဲ့မတ်လ တွေ မှာ ပိုမိုဖြစ်လာနိုင်တယ်လို့ အသိပေးထားပါတယ်။
