ရန်ကုန်မြို့ မှာ မတ်လ ၃ ရက် မနက် ၁၀နာရီဝန်းကျင်က မြေငလျင် သိသိသာသာ လှုပ်ခတ်ခဲ့တယ်လို့ ရန်ကုန်မြို့တွင် နေထိုင်သူတွေက ပြောပါတယ်။
“ကျွန်တော်တို့အိမ်ကတော့ ပျဉ်ထောင်အိမ်ကိုသိသိသာသာကို ယိမ်းယိုင်ပြီးလှုပ်သွားတာ။ တစ်အိမ်လုံး လှုပ်နေတာာ၊ ရေသန့်ဗူးထဲက ရေ ဆို ဘောင်ဘင်ခတ်နေတာ၊ အချိန်လည်း ကြတယ်”လို့ လှိုင်သာယာမြို့နယ် ၊ မီးခွက်ဈေးအနီး နေထိုင်သူတစ်ဦးက ပြောပါတယ်။
နံနက် ၁၀ နာရီ ၃ မိနစ်မှာ ငလျင် လှုပ်ခတ်ခဲ့တာလို့ မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားပြီး လှိုင်သာယာ၊ ရွှေပြည်သာ၊ သမိုင်း၊ စမ်းချောင်း၊ အင်းစိန်၊ကမာအေးကုန်းမြေ၊ ရန်ကင်း၊ မြောက်ဒဂုံ၊မြောက်ဥက္ကလာစတဲ့ မြို့နယ်တွေ ငလျင်လှုပ်တာကို သိသိသာသာခံစားခဲ့ရတယ်လို့ သိရပါတယ်။
"ကျွန်တော်ထင်တာ ၅မိနစ်လောက်ကြာမယ်။ ကျွန်တော်က သမိုင်းမှာသုံးထပ်တိုက်ဆောက်လုပ်ရေး ဝင်နေတာ ။ အပေါ်ဆုံးသုံးထပ်မှာထိုင်နေတာ။ အုတ်ပုံကလှုပ်နေလို့ အုတ်ခဲနှစ်လုံးလောက်ကပြုတ်ကျတော့ ၊ ဘာဖြစ် တာလဲပေါ့၊ ကြည့်ရေသန့်ဗူးကြည့်မှ အော်ငလျင်လှုပ်တာကြမ်းတယ်ပြောလို့ရတယ်။ လုပ်ငန်းခွင် ပျက်ဆီး ထိခိုက်အထိ တော့ မရှိနိုင်ဘူး"လို့ ဆောက်လုပ်ရေးလုပ်သား တဦးက ပြောပါတယ်။
မိုးလေဝသနှင့် ဇလဗေဒညွန်ကြားမှုဦးစီးဌာနရဲ့ မြေငလျင်သတင်းမှာတော့ ၂၀၂၅ ခုနှစ်၊ မတ်လ (၃) ရက်နေ့၊ မြန်မာစံတော်ချိန် (၁၀)နာရီ၊ (၀၃)မိနစ်၊ (၁၃)စက္ကန့် အချိန်မှာ ကမ္ဘာအေးမြေငလျင်စခန်း မြောက်-အနောက်မြောက် ဘက် (၂၇)မိုင်ခန့် အကွာ၊ တိုက်ကြီးမြို့ အရှေ့တောင်ဘက် (၇) မိုင်အကွာ အနက် (၁၀) ကီလိုမီတာကို ဗဟိုပြုပြီး အင်အားရစ်(ခ်)တာ စကေး (၄.၅) အဆင့်ရှိ အင်အားအနည်းငယ်ရှိ မြေငလျင်တစ်ခု လှုပ်ရှားသွားတယ်လို့ ထုတ်ပြန်ထားပါတယ်။
