လုပ်ငန်းခွင်အတွင်း ရက်မှန်ကြေး ပေးချေခြင်းမရှိတော့တာ အပြင် အလုပ်သမားဥပဒေပါ ရပိုင်ခွင့်တွေ ဖြစ်တဲ့ ခွင့်နှင့် အကျိုးခံစားခွင့်တွေလည်း မရှိတော့ဘူးလို့ SAN NGW YAUNG တာယာစက်ရုံအလုပ်သမားတွေကပြောပါတယ်။
အဆိုပါ စက်ရုံမှာ ရန်ကုန်တိုင်း လှိုင်သာယာစက်မှုဇုန် ၂ ၊ လှေအသင်းဝင်ဦးချိန်လမ်းမှာ ဖွင့်လှစ်ထားပြီး အလုပ်သမား ၈၀ ဝန်းကျင်နဲ့ လည်ပတ်နေတဲ့ စက်ရုံတစ်ခုဖြစ်တယ်လို့ သိရပါတယ်။
ယခင်ကအလုပ်သမားတွေကိုပေးထားသောရက်မှန်ကြေး(၂၀၀၀၀)ကျပ်ကို ဒုတိယကိုဗစ်လှိုင်းတွင်မပေးတော့ဘဲ၊ ဖြတ်တောက်ထားပြီး၊ စစ်အာဏာ သိမ်းပြီးနောက်မှာရက်မှန်ကြေးမပေးတော့ဘူးဟုအလုပ်ရှင်မှထပ်မံပြောဆိုခဲ့တယ်လို့ အလုပ်သမားတွေကပြောပါတယ်။
“စက်ရုံကအရင်ကဆို အလုပ်သမားတွေကို ၆ လသို့မဟုတ် ၁ နှစ်တစ်ခါပုံမှန်လစာတိုးပေးနေပြီး၊ အခုနောက်ပိုင်းမှာ အလုပ်ရှင်ကိုယ်စားလှယ်မန်နေဂျာနဲ့ ခေါင်းဆောင်ပိုင်းများက သူတို့နဲ့အဆင်ပြေတဲ့အလုပ်သမားဆိုရင် လစာတိုးပေးတယ် သူတို့နဲ့အဆင်မပြေတဲ့ အလုပ်သမားများကို အလုပ်ဘယ်လောက်လုပ်လုပ်လစာတိုးပေးခြင်းမရှိဘဲ ခွဲခြားဆက်ဆံခံနေရတယ်" လို့ အဆိုပါ စက်ရုံက အမည်မဖော်လိုတဲ့ စက်ရုံလုပ်သားတစ်ဦးကပြောပါတယ်။
အဆိုပါ လုပ်ငန်းခွင်မှာ ဥပဒေပါခံစားခွင့်ဖြစ်သောရှောင်တခင်ခွင့်ခံစားခွင့်ကိုခံစားခွင့်လုံး ၀မပေးဘူးလို့သိရပါတယ်။
အလုပ်သမားများကိုခွဲခြားဆက်ဆံတာတွေ အပြင် စက်ရုံရှိအလုပ်သမားများရဲ့လုပ်ငန်းခွင်ဆိုင်ရာ အဆင်မပြေမှုတွေ ဖြစ်ပေါ်ပါကလဲ ဖြေရှင်းဆောင်ရွက်ပေးခြင်းမရှိသည့်အတွက်အလုပ်သမားများအခက်ခဲများကြုံတွေ့နေရတယ်လို့ ဆိုပါတယ်။
SAN NGW YAUNG တာယာ စက်ရုံမှာ တရုတ် ဗီယက်နမ်စတဲ့ နိုင်ငံတွေကနေ သွင်းကုန်များ တင်သွင်းပြီး ပြည်တွင်းမှာပြန်လည်ဖြန့်ဖြူးရောင်းချနေတာဖြစ်တယ်လို့ သိရပါတယ်။
အလုပ်သမားတွေအနေနဲ့ အလုပ်သမားဉပဒေပါ ခံစားခွင့်တွေ ပြန်လည်ရရှိလိုပြီး ဖြတ်တောက်ထားတဲ့ ရက်မှန်ကြေးတွေ ပြန်လည် ရရှိလိုတယ်လို့ ဆိုပါတယ်။
