ကမ္ဘောဒီးယား နိုင်ငံရှိ ကျားဖြန့် အလုပ်ရုံ တွေမှာ လုပ်ကိုင်ခဲ့တဲ့ မြန်မာနိုင်ငံသား ၅၆၆ဦး ကို ယခု ဇန်နဝါရီ လ အတွင်း မြန်မာနိုင်ငံသို့ ပြန်လည်ပို့ဆောင်ခဲ့တယ်လို့ စစ်ကော်မရှင်ရဲ့ သတင်းထုတ်ပြန်ချက်အရသိရပါတယ်။
ပထမအသုတ်အနေဖြင့် မြန်မာနိုင်ငံသား ၁၃၆ ဦးကို ဇန်နဝါရီ ၂၃ရက်တွင် မြန်မာ့လေကြောင်းလိုင်း (MAI) ဖြင့် မန္တလေးမြို့ရှိ အပြည်ပြည်ဆိုင်ရာလေဆိပ်သို့ ပြန်လည်ခေါ်ဆောင်ရောက်ရှိခဲ့တယ်လို့ သိရပါတယ်။
ဒုတိယ အသုတ် အနေနဲ့ ဇန်နဝါရီ ၂၅ ရက်တွင် မြန်မာ့လေကြောင်းလိုင်း (MAI) ဖြင့် ၅၀ဦးကို မန္တလေးမြို့ရှိ အပြည်ပြည်ဆိုင်ရာလေဆိပ်သို့လည်းကောင်း၊ ၁၉၀ ဦးကို ညနေပိုင်းတွင် တပ်မတော်လေယာဉ် ၂ စီး ဖြင့် တနင်္သာရီတိုင်းဒေသကြီး၊ မြိတ်မြို့သို့လည်းကောင်း၊ ထပ်မံ၍ ၁၉၀ ဦးကို တပ်မတော်လေယာဉ် ၂ စီးဖြင့် တနင်္သာရီတိုင်းဒေသကြီး၊ မြိတ်မြို့သို့လည်းကောင်း ပြန်လည်ခေါ်ဆောင်ရောက်ရှိခဲ့ရာ စုစုပေါင်း မြန်မာနိုင်ငံသား ၅၆၆ ဦး ပြန်လည်ရောက်ရှိခဲ့ပြီ ဖြစ်တယ်လို့ စစ်ကော်မရှင် က ထုတ်ပြန်ထားပါတယ်။
အဲဒီ မြန်မာနိုင်ငံသားတွေဟာ ကမ္ဘောဒီးယားနိုင်ငံအတွင်း အွန်လိုင်းလိမ်လည်လောင်းကစားမှုများတွင် အကြောင်းအမျိုးမျိုး ကြောင့် ပါဝင်ပတ်သက်သူတွေ ဖြစ်ပြီး ၎င်းတို့အစီအစဉ်ဖြင့် ကမ္ဘောဒီးယားနိုင်ငံရှိ မြန်မာနိုင်ငံသံရုံးသို့ သတင်းပေးပို့မှုများအရလည်းကောင်း၊ ကမ္ဘောဒီးယားနိုင်ငံမှ ရဲတပ်ဖွဲ့နှင့် ဌာနဆိုင်ရာများက လွှဲပြောင်းပေးအပ်မှုများအရလည်းကောင်း ကမ္ဘောဒီယားနိုင်ငံ မြန်မာသံရုံးသို့ ရောက်ရှိခဲ့သူတွေ ဖြစ်တယ်လို့ ဆိုပါတယ်။
ကမ္ဘောဒီးယား မှ ပြန်လည်ရောက်ရှိသူတွေ ကို လိုအပ်တဲ့ ကိုယ်ရေးအချက်အလက် တွေ နဲ့ မှတ်တမ်းများ စာရင်းကောက်ယူခြင်း လိုအပ်တဲ့ စစ်ဆေးမှုတွေ ဆောင်ရွက်ကာ လုပ်ထုံးလုပ်နည်းများနဲ့ အညီ ဆက်လက်ဆောင်ရွက်သွားမှာ ဖြစ်ပြီး ကမ္ဘောဒီးယားနိုင်ငံ မှာ ကျန်ရှိနေတဲ့ မြန်မာနိုင်ငံသားတွေ ကို အမြန်ဆုံးပြန်လည်ခေါ်ဆောင် ဖို့ ဆက်လက်ဆောင်ရွက်သွားမယ်လို့ စစ်ကော်မရှင်က သတင်း ထုတ်ပြန်ထားပါတယ်။
လက်ရှိတွင် ကမ္ဘောဒီးယား ကျားဖြန့် အလုပ်ရုံ တွေ မှာ အကြောင်းအမျိုးမျိုးနဲ့ လူကုန်ကူးခံရပြီး ရောက်ရှိနေတဲ့ မြန်မာ နိုင်ငံသားတွေ များစွာရှိနေပြီး ကူညီကယ်ဆယ်ပေးဖို့ မြန်မာသံရုံးနဲ့ လူမှု အကူညီ အဖွဲ့စည်းတွေထံ တောင်းခံထားတာတွေ တွေ့ရပါတယ်။
