ထိုင်းရောက်မြန်မာအလုပ်သမား ၃၀၀ ကျော် ကို အလုပ်ပေးမယ်ဆိုကာ ငွေလိမ်လည် သွားတဲ့ ထိုင်းအမျိုးသမီး ၂ဦး ကိုထိုင်းအာဏာပိုင်တွေက ဖမ်းမိခဲ့ပေမယ့် ငွေအလိမ်ခံရတဲ့ အလုပ်သမားတွေ အနေနဲ့ ငွေပြန်ရနိုင်မယ့် အနေထားမရှိဘူးလို့ ထိုင်းရောက်မြန်မာအလုပ်သမားအရေးကူညီပေးနေတဲ့ AAC မဟာမိတ်အဖွဲ့ထံမှ သိရပါတယ်။

ပြီးခဲ့တဲ့ရက်ပိုင်း က မဟာချိုင်မြို့ စမူဆာခွန်ခရိုင် အတွင်းက အွန်လိုင်းရှော့ လုပ်ကိုင်တဲ့ စက်ရုံ အရှေ့မှာ ထိုင်းအမျိုးသမီး နှစ်ဦးက အလုပ်ပေးမယ်ဆိုကာ အလုပ်စမတ်ကြေး အဖြစ် မြန်မာအလုပ်သမား တစ်ဦး ကို ဘတ် ၃၅၀၀ မှ ၇၀၀၀အထိ ကောက်ယူခဲ့ပြီး   နိုဝင်ဘာ ၂၀ ရက်နေ့ တွင် ပထမအသုတ် အနေနဲ့ အလုပ်သမား ၁၀၀ ကျော် အလုပ်စဆင်းရာ မှ အလိမ်ခံရကြောင်း သိရှိပြီး ထိုင်းအာဏာပိုင်တွေကို အလုပ်သမားတွေ က အမှုဖွင့် တိုင်ကြားခဲ့တယ်လို့ သိရပါတယ်။

""လိမ်သွားတဲ့ ထိုင်း အမျိုးသမီး ၂ဦး ကို ၂၅ရက်နေ့က ဖမ်းမိတယ် သူတို့ကို တရားရုံးတန်း ပို့တယ် အခု အာမခံ ပေးထားလား မပေးထားလား မသိသေးဘူး စုံစမ်းနေတယ် အခုက အလိမ်ခံရတာ က ၃၀၀ကျော် လောက်ရှိတယ် ရဲစခန်းမှာ လာပြီး အမှုဖွင့်တာက အလုပ်သမား ၅၀ကျော်လောက်ပဲရှိသေးတယ် ကျန်တဲ့သူတွေ လာရောက် အမှုဖွင့်ဖို့ ကို ကျွန်တော်တို့ အနေနဲ့ လိုင်းပေါ် ကနေ အသိပေး ထားတယ် ""လို့ AAC မဟာမိတ်အဖွဲ့မှ ဒါရိုက်တာဦးခိုင်ကြီးက MLN ကိုပြောပါတယ်။

အခုလို လာရောက် အမှုဖွင့် တဲ့ အလုပ်သမားဦးရေ နည်းနေတဲ့ အပြင် အမှု အနေနဲ့ တရားရုံး ကို ရောက်ရှိသွားတဲ့ အတွက် အချိန်ကြာမြင့် နိုင်ခြင်း ၊ မြန်မာအလုပ်သမား တွေ အနေနဲ့ တရားရုံး မှာ ထွက်ဆိုရန် အချိန်ပေးနိုင်မှု နည်းတာ တွေကြောင့် လိမ်ခံရတဲ့ ငွေ များ ပြန်ရဖို့ အလား လားနည်းတယ်လို့ ဆိုပါတယ်။

""ထိုင်းနိုင်ငံရဲ့ ဥပဒေ မှာ က အခုလို အမှု တွေ ဖြစ်ရင် အချိန်ဆွဲလို့ရတယ် အချိန်ကြာလာတာနဲ့ အမျှ အလုပ်သမားတွေ အနေနဲ့ ရုံးချိန်း လာဖို့ တွေ ခက်လာတယ် တချို့ကျတော့လည်း ရုံးဘာညာတက်ရမှာ တွေ ကြောက်တော့ ပိုက်ဆံဆုံးပါစေ တော့ ဆိုပြီး မဆက်သွယ်ကြတော့ဘူး အခုလို အလုပ်သမားဦးရေ အများကြီးဆို ပိုဆိုးတာပေါ့ ""လို့ ဦးခိုင်ကြီးကဆက်လက်ပြောပါတယ်။

ထိုင်းနိုင်ငံ အတွင်း ရောက်ရှိနေတဲ့ အလုပ်လက်မဲ့ မြန်မာအလုပ်သမားတွေ ကို အလုပ်ရှာပေးမယ်ဆိုကာ လိမ်လည်မှု တွေ မကြာခဏ ဖြစ်ပေါ် လျက်ရှိပြီး လိမ်လည် သူတွေ က်ို ဖမ်းမိ ပြီး တရားဥပဒေအရ  အရေးယူနိုင် တာ ရှိပေမယ့်  လိမ်လည် ခံရတဲ့ ငွေကြေး ပြန်ရတာ မျိုး အလွန်နည်းတယ်လို့ ထိုင်းရောက်မြန်မာအလုပ်သမားရေးကူညီသူတွေထံကနေသိရပါတယ်။

#MyanmarLabourNews