ထိုင်းနိုင်ငံ၊ စမူပကန်၊ ဘန်းနားမြို့ စွယ်စီဒန်း မှာ ရှိတဲ့ CDK (အဲယားကွန်းပိုက်လမ်းတပ်ဆင်ရေး) လုပ်ငန်းလုပ်ကိုင်နေတဲ့ မြန်မာ အလုပ်သမား ၁၃ဦး ကို အလုပ်ရှင် မှ လုပ်ခလစာ ၂လစာ မပေးတဲ့ အပြင် အလုပ်မှ ထုတ်ပယ်လိုက်တယ်လို့ အလုပ်သမားတွေထံက သိရပါတယ်။
မြန်မာအလုပ်သမား ၁၃ဦး ဟာ ၎င်းစက်ရုံကို MOU စနစ် နဲ့ တရားဝင် လာရောက် အလုပ်လုပ်ကိုင်တာ ဖြစ်ပြီး လုပ်သက် တစ်နှစ်ကျော် ရှိပြီ ဖြစ်တယ်လို့ ဆိုပါတယ်။
စက်ရုံသူဌေး ဖြစ်သူ က ပြီးခဲ့တဲ့ ၂၀၂၄ ခုနှစ် ဒီဇင်ဘာလ ၁ ရက် နေ့ကနေ ၂၀၂၅ခုနှစ် ဇန်နဝါရီလ ၂၅ ရက်အထိ အလုပ်သမား တွေ ရရှိမယ့် လုပ်ခလစာ ၂လစာ ကို မရှင်းပေးဘဲ ချေးငွေအဖြစ် တစ်ဦး ကို ဘတ်၅၀၀ နဲ့ ၁၀၀၀ဘတ် သာ ထုတ်ပေးခဲ့ကာ နေ့တိုင်း အလုပ်ဆင်းရတဲ့ အပြင် အချိန်ပိုလည်း နေ့စဉ် ဆင်းရကာ အချို့ရက်တွေ မှာ မနက်၅နာရီ အထိ ဆင်းရတယ်လို့ အလုပ်သမားတွေက ပြောပါတယ်။
လုပ်ခလစာများကို ထုတ်ပေးရန် သူဌေးဖြစ်သူကိုတောင်းဆိုရာတွင် နောက်လတွင်ပေးမည်ဟုပြောခဲ့ ပြီး ၂၀၂၅ခုနှစ် ဇန်နဝါရီ ၂၅ရက်နေ့မှာ ၎င်းအလုပ်သမား {၁၃}ဦးကို သူဌေးဖြစ်သူမှ အလုပ်ထုတ်လိုက်ပြီး အဆောင်တွင်ပါ ပေးမ နေတော့ပဲ နေမည်ဆိုပါက အဆောင်ငှားခဆောင်ရမယ်လို့ ပြောဆိုခဲ့တယ်လို့ ဆိုပါတယ်။
လုပ်အားခ အနေဖြင့် အလုပ်သမားတစ်ဦးလျှင် ဘတ်၂၀၀၀၀ နှုန်း နဲ့ စုစုပေါင်း ဘတ်၂၆၀၀၀၀ ရရှိ ရ မှာ ဖြစ်တယ်လို့ သိရပါတယ်။
အခုလို၎င်းတို့ရဲ့ လုပ်အားခများမရရှိတဲ့ အတွက် စားဝတ်နေရေးအခက်အခဲများကြုံတွေ့နေရတာကြောင့် ထိုင်းရောက်မြန်မာ အလုပ်သမားအရေးကူညီပေးနေတဲ့ WAG-အလုပ်သမားမဟာမိတ်အဖွဲ့ထံ ဇန်နဝါရီ ၂၇ရက်က အကူညီတောင်းခံခဲ့ကာ WAG-အလုပ်သမားမဟာမိတ်အဖွဲ့ အနေနဲ့ လည်း ကူညီဆောင်ရွက်ပေးသွားမှာ ဖြစ်တယ်လို့ သိရပါတယ်။
