ထိုင်းရောက်မြန်မာအလုပ်သမားတွေကို မြန်မာနိုင်ငံနဲ့ ချိတ်ဆက်လုပ်ကိုင်နေတဲ့ ထိုင်း အခြေစိုက် အေဂျင်တွေဆီက တဆင့် လုပ်ခလစာ လွှဲပို့ဖို့ ဖိအားပေး ခြိမ်းခြောက်နေတယ်လို့ အလုပ်သမားတွေက ပြောပါတယ်။
“ထိုင်းနိုင်ငံက ကုမ္ပဏီက ဒီကနေ့ အစည်းအဝေးခေါ်တယ်။ အလုပ်သမားတိုင်း ၂၅ ရာခိုင်နှုန်းကို တရားဝင် နည်းလမ်းနဲ့ မြန်မာနိုင်ငံကို ငွေပို့ဖို့ကို ဖိအားပေး ခြိမ်းခြောက်တယ်” လို့ အလုပ်သမားတွေက ပြောပါတယ်။
၂၀၂၃ -၂၀၂၄ ဘဏ္ဍာနှစ်အတွင်းပြည်ပကို တရားဝင် စေလွှတ်တဲ့လုပ်သားဦးရေ နှစ်သိန်းနီးပါးရှိတယ်လို့ အလုပ်သမားညွှန်ကြားရေးဦးစီးဌာနကထုတ်ပြန်ထားပါတယ်။
အခုလို တရားဝင်ပို့ထားတဲ့လုပ်သားတွေအနေနဲ့ လွှဲငွေမပိုတဲ့ အလုပ်သမားတွေ မြန်မာနိုင်ငံသို့ ပြန်ဝင်လို့မရနိုင်သလို ထိုင်းမှာ သက်တမ်းတိုးတာနဲ့ တခြားကိစ္စတွေမှာ တာဝန်ယူဆောက်ရွက်ပေးမှာ မဟုတ်ဘူးဆိုပြီး ပြောဆိုတယ်လို့ အလုပ်သမားတွေက ပြောပါတယ်။
“ မဖြစ်မနေ လွှဲပေးဖို့ ပြောတာပေါ့၊ မလုပ်ရင်တော့ ဘာမှ မလုပ်ပေးဘူး ပြောတယ်။ တချို့ကတော့ ကြောက်ကြတာပေါ့၊ သူများနိုင်ငံမှာ နေရတော့ ၊ လွှဲမဲ့သူလည်း လွှဲကြတယ် ” လို့ အစည်းအဝေး ကိုယ်တိုင်တက်ရောက်ခဲ့သူ တဦးက ပြောပါတယ်။
စစ်ကောင်စီရဲ့ ငွေလွှဲရမဲ့နည်းလမ်းက အလုပ်သမားတွေအတွက် နစ်နာမှုတွေရှိပြီး တချို့လုပ်သားအတွက် အဆင်မပြေမှုတွေရှိနေတယ်လို့ အလုပ်သမားတဦးက ပြောပါတယ်။
“ နစ်နာမှုက ငွေဈေးအရမ်းကွာတယ်။ အပြင်မှာ ဘတ်၆၅၀ ကို ကျပ်တစ်သိန်းရနေတာ၊ western union က ဘတ်တထောင်မှ မြန်မာငွေ တစ်သိန်းနဲ့ တောင့်ငါးရာပဲ ဆိုတော့ အလုပ်သမားတွေအတွက် နစ်နာမှုများတယ်။ အဓိကကတော့ စစ်အာဏာရှင်ဆီကို သူတို့လိုနေတဲ့ နိုင်ငံခြားငွေမရောက်စေချင်ပါဘူးဗျ” လို့ ထိုင်းရောက် လုပ်သားတဦးက ပြောပါတယ်။
ပြည်တွင်းက လုပ်သားပို့တဲ့ အေဂျင်စီတွေအနေနဲ့လည်း ပြည်ပရောက် လုပ်သားတွေထံကနေ မိသားစုလွှဲပို့ငွေစာရင်းကို အေဂျင်စီ တွေ အနေနဲ့ တင်ပြနိုင်ခြင်း ရှိမရှိ ကို အလုပ်သမားဝန်ကြီးဌာန နေပြည်တော် ရုံးကို လာရောက် ရှင်းလင်းတင်ပြဖို့ အတွက် အေဂျင်စီတွေ ကို အလှည့်ကျခေါ်ယူစစ်ဆေးတာတွေလုပ်ဆောင်နေပါတယ်။
မိမိစေလွှတ်ခဲ့တဲ့ အလုပ်သမားတွေရဲ့ မိသားစုထံလွှဲပို့ ငွေ ကို တရားဝင်ဘဏ် ကနေ တစ်ဆင့် လွှဲပို့ထားတဲ့ အထောက်အထားတွေ ကို ယူဆောင်ကာ အလုပ်သမားဝန်ကြီးဌာန နေပြည်တော်ရုံးချုပ်သို့ အေဂျင်စီ မှ မန်နေဂျင်းဒါရိုက်တာ သို့မဟုတ် ဒါရိုက်တာအဖွဲ့ ဝင် တစ်ဦးဦးက ဩဂုတ်လ ၁၂ ရက်က စပြီး နေပြည်တော်ရှိ အလုပ်သမားဝန်ကြီးဌာန ရုံးကို အလှည့်ကျ သွားရောက်ရှင်းလင်းနေရတယ်လို့ အေဂျင်စီအသိုင်းအဝိုင်းမှ သိရပါတယ်။
