မြန်မာသံရုံးလိပ်စာဖြင့် သံရုံးအသွင်ယူကာ အင်တာနက်စာမျက်နှာ ဖွင့်လှစ်ပြီး နိုင်ငံကူးလက်မှတ်သက်တမ်းတိုးအပါအဝင် ကောင်စစ်ဆိုင်ရာကိစ္စရပ်တွေ ကို ဝန်ဆောင်မှုပေးကြောင်း ကြေညာပြီး ငွေကြေးလိမ်လည် တာတွေရှိနေတယ်လို့ စင်္ကာပူရှိ မြန်မာသံရုံးက အောက်တိုဘာ ၂၃ရက်မှာ အသိပေးကြေညာပါတယ်။

 

မြန်မာသံရုံးအနေနဲ့ နိုင်ငံကူးလက်မှတ်သက်တမ်း ၁၄ လအထိ လက်ကျန်ရှိသူတွေဟာ နိုင်ငံကူးလက်မှတ် ပထမစာမျက်နှာ (Biodata page) နှင့် သက်တမ်းရှိ work permit/ stay permit ကတ်ရှေ့/နောက်မိတ္တူ၊PR ကတ်ကိုင်ဆောင်သူတွေအနေနဲ့ Re- entry form 7 အား သံရုံးရဲ့ whatsapp နံပါတ်ကို သက်တမ်းတိုးရန် ပေးပို့ ကာ ရက်ချိန်းရယူနိုင်တယ်လို့ ထုတ်ပြန်ကြေညာထားပါတယ်။

 

၄င်းကြေညာချက် ကို မသိရှိသေးတဲ့ သူတွေ အပေါ် မြန်မာနိုင်ငံသား အချင်းချင်း စာနာထောက်ထားမှုမရှိဘဲ ရက်ချိန်းယူပေးမည်ဟုဆိုကာ လိမ်လည် အခကြေးငွေရယူတာတွေရှိနေသလို မြန်မာနိုင်ငံသား အချို့မှာ အခကြေးငွေပေးပြီးသော်လည်း ရက်ချိန်း မရတဲ့ အတွက် သံရုံးသို့လာရောက်တိုင်ကြား မှု များပါရှိလာတယ်လို့ ဆိုပါတယ်။

 

အခုလိုတိုင်ကြားမှု တွေ အရ စိစစ်ခဲ့ရာ မှာ မြန်မာသံရုံးလိပ်စာဖြင့် သံရုံးအသွင်ယူပြီး ကောင်စစ်ဆိုင်ရာ ဝန်ဆောင်မှုများဆောင်ရွက်နေတဲ့ အင်တာနက်စာမျက်နှာ ကို တွေ့ရှိရတဲ့ အတွက် မြန်မာနိုင်ငံသားများသတိပြုရှောင်ကြဉ်ဖို့ အသိပေးထားပါတယ်။

 

ဒါ့အပြင် နိုင်ငံကူးလက်မှတ် သက်တမ်းတိုး အတွက် သံရုံးသို့လာရောက်ဆောင်ရွက်စဉ် ကုန်ကျမည့် သတ်မှတ်နှုန်းထား ထက် ပိုမိုကောက်ယူမှုရှိပါက သံရုံးဝင်းအတွင်းမှ မထွက်ခွာမီ သံရုံးတာဝန်ခံ အရာရှိကို ချက်ချင်းတိုင်ကြားပေးဖို့နဲ့ သက်သေအချက်လက်ခိုင်လုံပါက ငွေကြေးပိုမိုကောက်ခံသူကို ထိရောက်စွာ အရေးယူသွားမယ်လို့ မြန်မာသံရုံးက ထုတ်ပြန်ကြေညာထားပါတယ်။