လာအိုနိုင်ငံက ဂိမ်းခုံမှာ အလုပ်လုပ်ကိုင်ရမယ်ဆိုပြီး လိမ်လည်ခေါ်ဆောင်ကာ အွန်လိုင်းငွေလိမ်လုပ်ငန်း ( ကျားဖြန့်)တွေဆီ ရောင်းစားခံခဲ့ရတယ်လို့ အဲ့ဒီကနေ ထွက်ပြေးလွတ်မြောက်လာတဲ့လူငယ်အချို့က ပြောပါတယ်။
လာအိုနိုင်ငံက အွန်လိုင်းငွေလိမ်လုပ်ငန်းလို့ခေါ်တဲ့ ကျားဖြန့် အလုပ်ရုံတစ်ခုမှာ ရောင်းစား ခံခဲ့ရတဲ့မြန်မာလူငယ်တွေထဲက ၇ ယောက်ဟာ လာအိုနိုင်ငံကနေ မြန်မာနိုင်ငံကိုပြန်လည်ထွက်ပြေးလွတ်မြောက်ခဲ့ပါတယ်။
ပြီးခဲ့တဲ့ ၂၀၂၄ မေလက အွန်လိုင်းကနေ ပွဲစားနှင့်ချိတ်ဆက်ရခဲ့ပြီး ကွန်ပျူတာလက်ကွက်ရပါက အလုပ်ရနိုင်ကြောင်း ၊ တစ်လလျှင် ယွမ် ၃၀၀၀ ရမည်ဖြစ်ကြောင်း ပြောဆိုခဲ့ပြီး တကယ်တမ်းရောက်ရှိချိန်မှာတော့ ကျားဖြန့်အတွက် အလုပ်လုပ်ကိုင်ခဲ့တာလို့ လူငယ်ကပြောပါတယ်။
"ကျနော်တို့ကို ကွန်ပျူတာ နဲ့အလုပ်ခေါ်တယ်ဆိုပြီးခေါ်တာ ဂိမ်းခုံဆိုပြီး စလော့တို့ဘာတို့ပဲထင်ခဲ့တာ နောက်မှသိလိုက်ရတာက ကျနော်တို့အတွက်ခေါ်တဲ့သူက ယွမ် ၁ သောင်းရတယ် ရှင်းရှင်း ခေါ် ခိုင်သဇင်ဦး သူ့ယောကျာ်းကဆေးစစ်သား သူအဖေကအရာရှိ"လို့ ပြန်လည်ထွက်ပြေးလွတ်မြောက်ခဲ့တဲ့ ကိုကို( အမည်လွှဲ)အသက် ၂၀ အရွယ် လူငယ်ကပြောပါတယ်။
ပြည်တွင်းမှာ အလုပ်အကိုင်ရှားပါးတာ နိုင်ငံရေးအခြေအနေနဲ့ စစ်မှုထမ်းဥပဒေတွေကြောင့် ပြည်ပကို သွားရောက်လုပ်ကိုင်ဖို့ ဆုံးဖြတ်ခဲ့တာလို့ ဆိုပါတယ်။သူတို့ကို လက်ရှိမှာ တယ်လီဂရမ်ကနေတဆင့် ခြိမ်းခြောက်ပြောဆိုတာတွေရှိနေတယ်လို့ ဆိုပါတယ်။
"ရောက်ရောက်ချင်းလက ကွန်ပျူတာလက်ကွက်ပဲစမ်းခိုင်းတာ နောက်တော့ ဖေစ့်ဘွခ်အကောင့်ဖွင့်ခိုင်းတယ် ထိုင်းမင်းသားပုံနဲ့ ပြီးတော့ပိုက်ဆံရှိတဲ့အမျိုးသမီးတွေကို add ခိုင်းတယ် မိတ်ဆွေဖွဲ့ခိုင်းပြီးချစ်သူလုပ်ခိုင်းတယ် ပြီးရင် ကမ္ဘာ့ရွှေအရောင်းအဝယ်အတူလုပ်မယ်ဆိုပြီး စည်းရုံးခိုင်းတယ်သူတို့ပြောတဲ့အတိုင်းမလုပ်ရင်ဒဏ်ပေးတယ် ကျင်စက်နဲ့ ကြာပွတ်တွေလည်းရှိတယ် သူတို့ပြောတဲ့အတိုင်းမလုပ်နိုင်ရင်တကယ်လုပ်ပါတယ် သူတို့ပြောတဲ့အတိုင်းလုပ်နိုင်ရင် လစာပေးတယ်။မရတဲ့သူတွေလည်းအများကြီးပါ"လို့ ယင်းကပြောပါတယ်။
အွန်လိုင်းငွေလိမ်လုပ်ငန်းအတွက် အလုပ်ချိန်က မနက် ၁၁ နာရီကနေ ည ၂ နာရီထိလုပ်ကိုင်ရပြီး တနင်္ဂနွေနေ့မှာတော့ ညနေ ၅ နာရီကနေ ၁ နာရီထိ လုပ်ခိုင်းတယ်လို့ ဆိုပါတယ်။ လုပ်ခိုင်းတဲ့အတိုင်းမလုပ်နိုင်ပါက အမျိုးသမီးတွေထိုင်ထ ၁၀၀ အမျိုးသားတွေဒိုက် အခါ ၁၀၀ ထိုးခိုင်းပြီး ဒဏ်ပေးလေ့ရှိတယ်လို့ ပြောပါတယ်။
" FOREVER အမည်နဲ့ဟော်တယ် ဖွင့်ထားပြီး နောက်မှာကျားဖြန့်လုပ်တာပါ ၂၁ ထပ်တိုက်ပါ။ တရုတ်လူမျိုး တွေက မြန်မာစကားပြန်တွေနဲ့ပါ Van pak len မြို့မှာ"လို့ လွတ်မြောက်လာတဲ့လူငယ်က ပြောပါတယ်။
ပြန်လည်ထွက်ပြေးခဲ့တဲ့ လူငယ် ၇ ယောက်ထဲမှာ အမျိုးသမီးငယ် ၂ ဦးပါဝင်ပြီး သူတို့အနေနဲ့ မှတ်ပုံတင်တွေ သိမ်းဆည်းခံထားရပြီး သက်ဆိုင်ရာကိုတိုင်ကြားဖို့ အခက်အခဲရှိနေတယ်လို့ ပြောပါတယ်။
"ကျားဖြန့်မှန်း မသိခဲ့ပါဘူး။သိတော့မလုပ်ချင်ဘူးပေးထွက်ပါလို့ပြောပါတယ်။ သူတို့က ပေးမထွက်ပါဘူး မင်းတို့အတွက်ပိုက်ဆံတွေအများကြီးအကုန်ခံထားရတယ်လို့ပြောပါတယ်။ကျွန်တော်တို့လို လူငယ်တွေကို အရေးကြီးသတိပေးချင်တာက မသွားစေချင်ဘူး။ ရက် ၄၀ တိတိလည်းသူတို့သင်ပေးရတာပါ ဆိုပြီးလစာတွေဘာတွေမပေးပါဘူး။နောက်ထပ်မခံရအောင်ခေါ်တဲ့သူတွေရဲ့ပုံတွေကိုတစ်ခြားလူတွေသိစေချင်ပါတယ်။"လို့ လွတ်မြောက်ခဲ့တဲ့ လူငယ်ကပြောပါတယ်။
အဆိုပါ လုပ်ငန်းမှာ မြန်မာလူငယ် ၁၈၀ ဝန်းကျင်ရှိနေပြီး တရုတ်လူမျိုးတွေဦးစီးတဲ့ အဆိုပါ ကျားဖြန့်လုပ်ငန်းမှာ မြန်မာစကားပြန်တွေနဲ့ ခိုင်းစေနေတာလို့ သိရပါတယ်။
သူတို့အနေနဲ့ ထွက်ပြေးဖို့ကြိုးစားတာကို တွေ့ရှိပါက ထိုးကြိတ်တာ ကြာပွတ်နဲ့ရိုက်တာတွေပြုလုပ်တာကြောင့် ကူညီကယ်ဆယ်ပေးကြဖို့ လိုအပ်နေတယ်လို့ ပြောပါတယ်။
Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
#MyanmarLabourNews
