မြန်မာနိုင်ငံရဲ့ပြည်နယ် နဲ့ တိုင်း ၉ ခုက မြို့နယ် ၅၉ မြို့နယ်မှာ စက်တင်ဘာ ၁၀ ရက်ကစတင်တဲ့ရာဂိမုန်တိုင်း နောက်ဆက်တွဲမိုးသည်းထန်စွာရွာသွန်းမှုကြောင့် ရေကြီးနစ်မြုပ်တာတွေဖြစ်ပေါ်ပြီး လူဦးရေပေါင်း ၆၃၁၀၀၀ ခန့် ရေဘေးသင့်ခဲ့ပြီး သေဆုံး၊ပျောက်ဆုံးနဲ့ဒဏ်ရာရ ရှိသူတွေရာနဲ့ချီရှိခဲ့တယ်လို့ ကုလသမဂ္ဂ လူသားချင်းစာနာမှုဆိုင်ရာညှိုနှိုင်းရေးရုံး OCHA myanmar က သတင်းထုတ်ပြန်ပါတယ်။
ရေကြီးနစ်မြုပ်တာတွေကြောင့် မြန်မာနိုင်ငံရဲ့မြို့တော် နေပြည်တော်နဲ့ ပဲခူး၊ ကယား၊ ကရင်၊ မကွေး၊ မန္တလေး၊ မွန်၊ ရှမ်း အရှေ့ပိုင်းနဲ့ တောင်ပိုင်းတို့ အပါအဝင် တိုင်းဒေသကြီးနဲ့ ပြည်နယ် ကိုးခုရှိ ၅၉ မြို့နယ် ကို ထိခိုက်ခဲ့ကြောင်း၊ သတင်းအချက်အလက်များ အတည်ပြုနိုင်ရန် အခက်အခဲများရှိနေပေမယ့် နိုင်ငံတစ်ဝန်း ရေဘေးသင့်သူ ၆ သိန်းကျော် ရှိကာရာနဲ့ချီလူသေဆုံးမှုများရှိခဲ့ပြီး အများအပြား ပျောက်ဆုံးလျက်ရှိတယ်လို့ ဆိုပါတယ်။
လက်ရှိအချိန်အထိ နေရာအများစုမှာ ရေလွှမ်းနေဆဲဖြစ်ပြီး ဘေးလွတ်ရာရွှေ့ပြောင်းခြင်းနဲ့ အရေးပေါ်အကူအညီပေးခြင်းများ ဆက်လက်လုပ်ဆောင်လျက်ရှိနေသလို အခက်အခဲများ ရှိနေပေမယ့် လူသားချင်းစာနာမှုဆိုင်ရာ မိတ်ဖက်အဖွဲ့များက ထိခိုက်မှုများကို စတင်သတင်းပေးပို့လျက်ရှိပြီး၊ အခြေအနေပေးသလိုတုံ့ပြန်ရေးလုပ်ငန်းများ စတင်နိုင်ရန် စီစဉ်နေတယ်လို့ ကုလသမဂ္ဂ လူသားချင်းစာနာမှုဆိုင်ရာညှိုနှိုင်းရေးရုံး OCHA myanmar က အသိပေးဖော်ပြထားပါတယ်။
ပြည်တွင်းမှာဖြစ်ပွားနေတဲ့ ရေဘေးအခြေအနေ ကိုလက်ရှိအချိန်အထိ ဆိုးရွားစွာရင်ဆိုင်နေရတဲ့ဒေသတွေရှိနေ သေးကာ စားရေးရိက္ခာနဲ့အခြေ ခံလူသုံးကုန်တွေ လိုအပ်နေတဲ့ နေရာဒေသတွေလည်း အမြောက်များရှိနေပါတယ်။
စစ်ကောင်းစီအနေနဲ့ လက်ရှိ မြန်မာနိုင်ငံရဲ့ ရေဘေးမှာ ရေဘေးသင့်ပြည်သူ ၃ သိန်းကျော်နဲ့ သေဆုံးသူ ၂၂၆ ဦး၊ ပျောက်ဆုံးသူ ၇၇ ဦး ရှိနေတယ်လို့ စက်တင်ဘာ ၁၆ရက် ညနေ၄နာရီအထိ နောက်ဆုံးထုတ်ပြန်တဲ့စာရင်းမှာ ဖော်ပြထားပါတယ်။
ဒေသတွင်း သတင်းတွေနဲ့ လူမှုကူညီရေး အဖွဲ့တွေရဲ့ ရေဘေးကြောင့် သေဆုံး၊ ပျောက်ဆုံးသူ စာရင်းအချို့မှာတော့ သေဆုံးသူအရေအတွက်၄၀၀ ကျော်နဲ့ ပျောက်ဆုံသူလည်းရာချီရှိနေတာ ဖြစ်သလို သေဆုံး၊ ပျောက်ဆုံးအရေအတွက်တွေလည်း ထပ်တိုးလာနိုင်တယ်လို့သိရပါတယ်။
Photo-MFSD-နေပြည်တော် တပ်ကုန်း
