မတ်လ ၂၈ရက် မွန်းတည့် ၁၂နာရီ ၅၀မိနစ် ခန့် မှာ ပြင်းအားများတဲ့ ငလျင် တစ်ခု အချိန် အတော်ကြာအောင် လှုပ်ခတ်သွားတဲ့ အတွက် နိုင်ငံတစ်ဝန်း ပျက်စီးဆုံးရှုံးမှု များပြား နိုင်တယ်လို့ သိရပါတယ်။ 

၎င်းငလျင် လှုပ်ခတ်မှုဒဏ်ကို ရန်ကုန်၊ မန္တလေး၊ တောင်ကြီး၊အောင်ပန်း စတဲ့ မြို့တွေ အတော်များများမှာ သိသိသာသာခံစား ခဲ့ရပြီး ပျက်စီးဆုံးရှုံး မှု တွေ ဖြစ်ပေါ်တာတွေ လည်း များနိုင်တယ်လို့ သိရပါတယ်။ 

အမေရိကန်ငလျင်ဌာန USGS ရဲ့ ထုတ်ပြန်ချက်အရ ယခုငလျင်လှုပ်ခတ်မှု ဟာ စစ်ကိုင်းမြို့ကို ဗဟိုပြု၍ပြင်းအား ၇ဒသမ ၇ အဆင့်ရှိ ငလျင်ကြီး လှုပ်ခတ်မှု ဖြစ်တယ်လို့ ဆိုပါတယ်။ 

လက်ရှိ လူမှုကွန်ယက် မှာ တွေရတဲ့ သတင်းတွေ အရ မန္တလေးမြို့ရှိ အဆောက်အဦးများပြိုကျပျက်စီးမှုတွေ၊စစ်ကိုင်းတံတားအဟောင်းပြိုကျမှု၊အောင်ပန်းမြို့ရှိ အဆောက်အဦးအချို့ပြိုကျမှုများ တွေ့ရပါတယ်။ 

""အောင်ပန်းက ဟိုတယ် အောင်ပန်း ပြိုကျတာ အတော်လေး များတယ် အထဲ မှာ ဝန်ထမ်းတွေ ပိတ်မိနေတယ် ကယ်ဆယ်ရေး လုပ်ပေးဖို့ လုပ်နေပါတယ်""လို့အောင်ပန်းဒေသခံတစ်ဦးကပြောပါတယ်။ 

အခုလို ငလျင်ကြီး လှုပ်ခတ်ပြီး  နောက်ပိုင်း နောက်ဆက်တွဲ ငလျင်များ လှုပ်ခတ်နိုင်တဲ့ အတွက် ပြည်သူတွေ သတိပြု နေကျဖို့ ပညာရှင်တွေက လှုံ့ဆော်ထားပါတယ်။ 

ယခုပြင်းအားပြင်း ငလျင်ကြောင့် မြန်မာနိုင်ငံ အပြင် ထိုင်းနိုင်ငံ နဲ့ အာရှနိုင်ငံ အချို့ပါ လှုပ်ခတ်ခဲ့တယ်လို့ သိရပါတယ်။

Photo-CJ _လူမှုကွန်ယက်