မြန်မာနိုင်ငံကို ILO Article 33 နဲ့ အရေးယူဖို့ အပြည်ပြည်ဆိုင်ရာအလုပ်သမားအဖွဲ့ချုပ် (ILO)က ဒီကနေ့ ဆုံးဖြတ် အတည်ပြုတယ်လို့ မြန်မာနိုင်ငံအလုပ်သမားသမဂ္ဂများအဖွဲ့ချုပ် (CTUM) က လူမှုကွန်ရက်စာမျက်နှာ ဖေ့ဘွတ်မှာ ထုတ်ပြန်ထား ပါတယ်။
၁၁၃ ကြိမ်မြောက် အပြည်ပြည်ဆိုင်ရာအလုပ်သမားညီလာခံ (ILC) ကနေ မြန်မာနိုင်ငံနဲ့ စစ်ကောင်စီကို အရေးယူဖို့ တညီတညွတ်တည်း ဆုံးဖြတ်အတည်ပြုလိုက်တာလို့ ရေးသားထားပါတယ်။
အလုပ်သမားအခွင့်အရေးနဲ့ လူ့အခွင့်အရေးချိုးဖောက်မှုတွေ ကြောင့် မြန်မာစစ်ကောင်စီကို ပြင်းထန်တဲ့ ဒဏ်ခတ်ပိတ်ဆို့ အရေးယူခဲ့တာလို့ သိရပါတယ်။
လက်ရှိ စစ်ကောင်စီက အလုပ်သမားအဖွဲ့ချုပ်တွေ ဖြစ်တဲ့ MICs-TUF ရဲ့ အထွေထွေ အတွင်းရေးမှူး ဦးသက်နှင်းအောင်၊ CTUM က ဒေါ်ခင်စုစုလှိုင်တို့ကို စစ်ကောင်စီက ဖမ်းဆီးထောင်ချထားပြီး ခြွင်းချက်မရှိ အမြန်ဆုံး ပြန်လွှတ်ပေးဖို့ ILO က တောင်းဆိုထားပါတယ်။
စစ်ကောင်စီက အတင်းအဓမ္မ စစ်သားစုဆောင်းမှူတွေ ပြုလုပ်နေတဲ့အပြင် အလုပ်သမားအရေး ဆောင်ရွက်သူတွေကို ခြိမ်းခြောက်ဖမ်းဆီးတာတွေလည်း ပြုလုပ်နေတာပါ။
မြန်မာနိုင်ငံကို ILO Article 33 အရေးယူဒဏ်ခတ်မှုက ဒုတိယအကြိမ် ဖြစ်ပြီး ၂၀၀၀ ပြည့်နှစ်တုန်းက ပထမအကြိမ် အရေးယူခံရဖူးပါတယ်။
၁၁၃ ကြိမ်မြောက် အပြည်ပြည်ဆိုင်ရာအလုပ်သမားညီလာခံ ကို ဇွန် ၂ ရက်မှ ၁၃ ရက်ထိ ဆွစ်ဇာလန်နိုင်ငံ၊ ဂျီနီဗာမြို့မှာ ကျင်းပနေတာ ဖြစ်ပါတယ်။
