ထိုင်းနိုင်ငံ ဗန်ကောက်မြို့၊ အမြန်လမ်းမိုးပျံတံတား ကရိန်းသံဘောင် ပြိုကျမှုကြောင့် ထိခိုက်သေဆုံးခဲ့တဲ့ မြန်မာအလုပ်သမားလေးဦး အတွက် နစ်နာကြေး အဖြစ် အလုပ်သမားတစ်ဦး ကို ဘတ်တစ်သန်းစီ ဖြင့် ဘတ် ၄ သန်း နစ်နာကြေးရရှိတယ်လို့ ထိုင်းနိုင်ငံ ရှိ မြန်မာအလုပ်သမား သံအရာရှိရှံးက သတင်းထုတ်ပြန်ပါတယ်။
ပြီးခဲ့တဲ့ ၂၀၂၄ ခုနှစ် နိုဝင်ဘာလ ၂၉ ရက်၊ နံနက် ၄ နာရီ အချိန်ခန့် က ထိုင်းနိုင်ငံ၊ စမုစခွန်၊ ဖလမ်းဆောင်လမ်းမကြီး (RAMA-2)၊ ၂၁ မိုင်ရှိ အမြန်လမ်းမိုးပျံတံတား တည်ဆောက်ရေး လုပ်ငန်းခွင် မှာ ကွန်ကရစ်ဘလောက်တုံးများ ချိတ်ဆက်တပ်ဆင်စဉ် ကရိန်းသံဘောင် ပြိုကျမှု ကြောင့် မြန်မာနိုင်ငံသားအလုပ်သမား (၄) ဦး ထိခိုက်သေဆုံးခဲ့တာ ဖြစ်ပါတယ်။
သေဆုံးခဲ့တဲ့ မြန်မာလုပ်သား လေးဦး ရဲ့ နစ်နာမှုအတွက် ၂၀၂၅ ခုနှစ်၊ မေလ ၃၀ ရက်တွင် ထိုင်းနိုင်ငံ၊ ဗန်ကောက်မြို့ရှိ မြန်မာသံရုံး၌ ထိုင်း UDONSAK CHIANGMAI Co., Ltd ဘက်မှ လူသားချင်းစာနာထောက်ထားမှုအရ သေဆုံးနစ်နာမှု စေတနာကြေးငွေ အဖြစ် တစ်ဦး ကို ထိုင်းဘတ်ငွေ (၁) သန်းစီဖြင့် စုစုပေါင်းထိုင်းဘတ်ငွေ (၄) သန်း ကို မြန်မာသံရုံး၊ တာဝန်ရှိသူများရဲ့ ရှေ့မှောက်တွင် ထိုင်း UDONSAK CHIANGMAI Co., Ltd တာဝန်ရှိသူများ က သေဆုံးသူ အလုပ်သမားတွေရဲ့ မိသားစုဝင် (၄) ဦးထံသို့ လက်ရောက်ပေးအပ်ခဲ့တယ်လို့ မြန်မာအလုပ်သမားသံအရာရှိရုံးက ထုတ်ပြန်ထားပါတယ်။
၎င်းမိုးပျံတံတားစီမံကိန်း ကရိန်းသံဘောင် ပြိုကျမှုကြောင့် မြန်မာလုပ်သားလေးဦးနဲ့ ထိုင်းနိုင်ငံသားလုပ်သားတစ်ဦးသေဆုံးခဲ့ကာ မြန်မာလုပ်သားအပါအဝင် ထိခိုဒဏ်ရာ ရရှိတဲ့ လုပ်သား ကိုးဦး ရှိခဲ့တယ်လို့ သိရပါတယ်။
