မန္တလေးတိုင်း၊ ရမည်းသင်းမြို့နယ်၊ မိုးထိမိုးမိရွှေလုပ်ကွက်များတွင် မိုးသည်းထန်စွာ ရွာသွားမှုကြောင့် မြေပြိုကျမှုများဖြစ်ကာ ရွာလုံးကျွတ်မြေအောက်ရောက်ကာ အလုပ်သမားအများပြား ပျောက်ဆုံးနေတယ်လို့ သိရပါတယ်။
"ခုသတင်းရလို့ ကျွန်တော်တို့မိတ်ဖက်ပရဟိတအသင်းတွေကို လိုက်မေးကြည့်တော့ အားလုံးကရေဘေးမှာဆင်းကယ်နေကြတော့ လက်ရှိမြေပြိုမှုမှာမြေပြင်ကိုမရောက်သေးဘူးသိရတယ်။ သတင်းအရတော့ ၇၀၀ ကြားတယ်ပြောတယ်။ သူတို့ဒေသခံမေးတော့ ကျန်ခဲ့တဲ့လူအရေအတွက်အရ ခန့်မှန်းရင် ၄၀၀ ကျော် ၅၀၀ လို့ပြောတယ် ရေဘေးရှောင်နေတာရောဆိုတော့ လူဦးရေမှန်းမရသေးလို့ အတိအကျမပြောနိုင်ဘူးပြောတယ်ဗျ" လို့ လူမှုကူညီရေးအသင်းတစ်ခုမှ သိရပါတယ်။
ရမည်းသင်းမြို့နယ်၊ မိုးထိမိုးမိရွှေလုပ်ကွက်မှာ ရွှေတူးဖော်ရေးလုပ်ကွက်နှင့် ရွှေတူးဖော်ရေးအလုပ်သမားများနေထိုင်ရာနေရာများဖြစ်ကာ မိုးထိမိုးမိရွှေတူးဖော်ရေးတွင် လုပ်ကွက်ပေါင်း၄၀ နီးပါးရှိတယ်လို့သိရပါတယ်။
စက်တင်ဘာ ၁၁ ရက်နဲ့၁၂ရက်နေ့တွေမှာ မိုးသည်းထန်စွာရွာသွန်းမှုကြောင့် ရမည်းသင်းမြို့နယ်အတွင်းရှိ သပြေပင်ကျေးရွာဟာ တောင်ကျချောင်းရေနဲ့အတူ မြေပြိုကာမြေကြီးအောက်ရောက်ရှိသွားတာဖြစ်ပြီး အခြားသော
ငါးတဲစုကျေးရွာ၊ အရှေ့ပင်ရွာ အပါအဝင် ကျေးရွာအများအပြားလည်း ပါဝင်သွားတယ်လို့ သိရပါတယ်။
ရမည်းသင်းမြို့နယ်၊ သပြေပင်ကျေးရွာဟာ အိမ်ခြေ ၃၅၀ ကျော်ရှိတဲ့အနက် အမြင့်ပိုင်းက အိမ်ခြေ ၄၀ ကျော်သာကျန်ရှိခဲ့ပြီး လူဦးရေ ၁၆၀၀ မှာ ၉၀၀ လောက်သာ ကျန်တယ်လို့ သတင်းတွေအရ သိရပါတယ်။
မိုးထိမိုးမိ ရွှေတူးဖော်ရေးလုပ်ကွက်မှာ အလုပ်လုပ်တဲ့ အလုပ်သမား မိသားစုတွေ နေကြပြီး လူဦးရေ ၁၆၀၀ အနက် အမြင့်ပိုင်းတွေ တက်ပြီး ကျန်ခဲ့တဲ့လူဦးရေ ၃၀၀၊ သပြေပင် ဘုန်းတော်ကြီး ကျောင်းမှာခုံလှုံနေတဲ့ လူဦးရေ ၃၅၀နဲ့ ရေဘေးသင့်စခန်းမှာ ၂၅၀ စုစုပေါင်း လူဦးရေ ၉၀၀ လောက်ပဲ ကျန်ခဲ့ပြီးကျန်တဲ့ ၇၀၀ လောက် ပျောက်နေတယ်လို့ သိရပါတယ်။
လက်ရှိအချိန်မှာ ရေဘေးသင့်နေရာတွေအများအပြားရှိပြီး ရေဘေးကယ်ဆယ်ရေးကိုလုပ်ဆောင်နေတာကြောင့်
ရမည်းသင်းမြို့နယ်အတွင်းရှိ ကျေးရွာများသို့ ကယ်ဆယ်ရေး ရောက်ရှိလာခြင်းမရှိသလို အသက်ရှင်ကျန်ရစ်သူများမှာလည်း စားဝတ်နေရေး အခက်အခဲများကြုံတွေ့နေရတယ်လို့သိရပါတယ်။
