ထိုင်းနိုင်ငံ ၊ ဆောင်ခလာပြည်နယ်၊ ချန်နာခရိုင်မှာ ရဲတပ်ဖွဲက မလေးရှားနိုင်ငံဆီ ပိုဆောင်ပေးတဲ့ ထိုင်းလူမျိုး နှစ်ဦးနဲ့ အတူ မြန်မာ ၁၀ ဦးကို ဖမ်းဆီးခဲ့တယ်လို Thaiger သတင်းမှာ ရေးထားပါတယ်။ ဇန်နဝါရီ ၂၅ ရက် ညနေပိုင်းက ပြည်နယ် အဝေးပြေးလမ်းမပေါ်မှာ ဟွန်ဒါဆီဒင်ကားနဲ့ ပါဂျယ်ဒို ကားတွေပေါ်မှာလိုက်ပါလာတဲ့ ဖမ်းဆီးခံရတဲ့ မြန်မာလူမျိုးတွေနဲ့အတူ ထိုင်းလူမျိုးတွေကို တွေ့ရှိ ခဲ့ရတာပါ။
မလေးရှားနိုင်ငံကို တရားမဝင်သွားရောက်မဲ့ မြန်မာရွှေ့ပြောင်းသွားလာသူတွေကို လမ်းခုလတ်မှာပဲ ထိုင်း အမြန်လမ်း ရဲတပ်ဖွဲ့က ဖမ်းဆီးခဲ့တာဖြစ်ပါတယ်။ မြန်မာရွှေ့ပြောင်းသွားလာသူတွေထဲမှာ အမျိုးသား ၇ ဦးနဲ့ အမျိုးသမီး ၃ ဦး ပါဝင်တယ်လို သိရပြီး အသက်အရွယ်တွေကိုတော့ ဖော်ပြမထားပါဘူး။
ထိုင်း ယာဉ်မောင်း ၂ ဦးက ရတ္တပူခရိုင်ကနေ ပတ်တာနီပြည်နယ်က မြိုတမြို့ဆီကို တဦး ဘတ်ငွေ ၂၀၀၀ နဲ့ ပိုဆောင်ပေးရမှာ ဖြစ်တယ်လိုလည်း Bangkok Post သတင်းစာကို ကိုးကားပြီး ဖော်ပြထားပါတယ်။ ဖမ်းဆီးခဲ့တဲ့ ဆောင်ခလာပြည်နယ် ကနေ မလေးရှားနိုင်ငံဆီ မိုင် ၁၅၀ ဝန်းကျင် ကွာဝေးပြီး ယာဉ်မောင်း အဆင့်ဆင့်က ခရိုင်အလိုက် ပိုဆောင်ပေးမှာ ဖြစ်တယ်လို သိရပါတယ်။
ဖမ်းဆီးခံရတဲ့ မြန်မာတွေဟာ လွန်ခဲ့တဲ့ ငါးရက်က ရန်ကုန်ကနေ ထွက်ခွာလာသူတွေလို့ ထိုင်းရဲတပ်ဖွဲဝင်က ပြောပါတယ်။ မလေးရှားနိုင်ငံကို ရောက်သွားပါက တဦး ထိုင်းဘတ်ငွေ ၁၂၀၀၀၀ (အမေရိကန် ဒေါ်လာ ၃၅၇၀) ပေးရမှာ လိုလည်း ဖမ်းဆီးခံ မြန်မာရွှေ့ပြောင်းသွားလာသူတွေက ပြောဆိုတယ်လို့ ဖော်ပြထားပါတယ်။
ပြီးခဲ့တဲ့ ဇန်နဝါရီ ၂၁ ရက်ကလည်း ထိုင်းအဝေးပြေးလမ်း တစ်ခုပေါ်မှာ ပိုဆောင်ပေးသူ မြန်မာလူမျိုး ၂ ဦးနဲ့ အတူ တခြားမြန်မာလူမျိုး ၁၀ ဦးကို အယုဒ္ဓလူဝင်မှုကြီးကြပ်ရေးအဖွဲနဲ့ ပူးပေါင်းအဖွဲတွေက ဖမ်းဆီးခဲ့တယ်လို့လည်း သတင်းမှာ ဖော်ပြထားပါတယ်။
