မလေးရှား နိုင်ငံသို့ တရားမဝင် နယ်စပ်ဖြတ်ကျော် ဝင်ရောက်လာတဲ့အထောက်အထားမဲ့ မြန်မာနိုင်ငံသား ၁၃ဦးနဲ့ယာဉ်မောင်းဖြစ်သူ ထိုင်းနိုင်ငံသား ကို မလေးရှားရဲတပ်ဖွဲ့မှ ဖမ်းဆီးခဲ့တယ်လို့ ဒေသတွင်း သတင်းတွေအရ သိရပါတယ်။
နိုဝင်ဘာ ၁ရက် ညပိုင်းမှာ မလေးရှား နိုင်ငံ ကလန်တန်ပြည်နယ် သို့ ထိုင်းနိုင်ငံ နယ်စပ် ကနေ ဖြတ်ကျော်လာတဲ့ မြန်မာနိုင်ငံသား အမျိုးသား ၆ဦးနဲ့အမျိုးသမီး၇ဦး တို့ကို ဖမ်းဆီးခဲ့တယ်လို့ ဆိုပါတယ်။
၎င်းမြန်မာနိုင်ငံသားများ ကို ထိုင်းနိုင်ငံသား ယာဉ်မောင်း ဖြစ်သူက ခေါ်ဆောင်လာတာ ဖြစ်ပြီး မလေးရှား အာဏာပိုင်တွေက တားဆီးစစ်ဆေး ချိန်မှာ ထွက်ပြေးရန် ကြိုးစားခဲ့ပေမယ့် ယာဉ်မှာ လမ်းဘေးသို့ ထိုးကျသွားတာကြောင့် ဖမ်းမိခဲ့တယ်လို့ သိရပါတယ်။
ဖမ်းဆီးခံရတဲ့ အထောက်အထားမရှိတဲ့ မြန်မာ ၁၃ ဦးကို ၁၉၅၉/၆၃ ခုနှစ် လူဝင်မှုကြီးကြပ်ရေးဥပဒေ ပုဒ်မ ၆(၁)(ဂ) အရ စစ်ဆေးအရေးယူခဲ့ပြီး
ယာဉ်မောင်းဖြစ်သူ အသက် ၃၈ နှစ်အရွယ် ထိုင်းနိုင်ငံသားကို တော့ ၂၀၀၇ ခုနှစ် ပြဌာန်းချက် လူကုန်ကူးမှုအက်ဥပဒေအရ ဖမ်းဆီးခဲ့ကာIPD Tumpat(အိုင်ပီဒီတွန်ပါးရဲစခန်း သို့ ခေါ်ဆောင်သွားခဲ့တယ်လို့ သိရပါတယ်။
မလေးရှား နိုင်ငံ သို့ အလုပ်လုပ်ကိုင်ရန် လာရောက်ရင်း တရားမဝင် နယ်စပ်ဖြတ်ကျော်လို့ အခုလို အဖမ်းခံရတဲ့ မြန်မာနိုင်ငံ သားတွေ ရှိသလို မလေးရှားနိုင်ငံ အတွင်း အထောက်အထားမရှိဘဲ နေထိုင် အလုပ်လုပ်ကိုင်လို့ အဖမ်းခံရတဲ့ မြန်မာအလုပ်သမားတွေ လည်း လစဉ် ဦးရေ ရာချီရှိနေပါတယ်။
