မြန်မာနိုင်ငံသို့ CI ဖြင့် ပြန်ရန် အတွက် လုပ်ဆောင်ထားတဲ့ မလေးရှားရောက် မြန်မာအလုပ်သမား အမျိုးသားတစ်ဦးဟာ တိုက်ပေါ် ၁၉လွှာ ကနေ ခုန်ချ တဲ့အတွက် သေဆုံး ခဲ့တယ်လို့ နှလုံးလှပရဟိတ လူငယ်များသွေးလှူရှင်အဖွဲ့ ကွာလာလမ်ပူ-မလေးရှား ထံကသိရပါတယ်။
၎င်း မြန်မာအလုပ်သမားဟာ မြန်မာနိုင်ငံ သို့ CI ဖြင့် ပြန်ရန် အတွက် မလေးရှားနိုင်ငံ ကွာလာလမ်ပူမြို့ နယ်ထဲ ရှိ ပွဲစားအိမ်သို့ရောက်ရှိခဲ့ရာ ရောက်ရှိပြီးမကြာခင်မှာ တိုက်( ၁၉ )လွှာကနေ ခုန်ချသွားခဲ့တယ်လို့ဆိုပါတယ်။
""အခုလို ဖြစ်သွားပြီးနောက် မှာ သူ့ရဲ့အစ်မ ဝမ်းကွဲကို မေးကြည့်တဲ့အခါ ကျန်းမာရေးမကောင်းဘူးလို့ သိခဲ့ရပါတယ်။ကျွန်တော်တို့ မြန်မာနိုင်ငံသားတွေ အနေနဲ့ ကျန်းမာရေး အသဲသန် ဖြစ်မှ ဆေးရုံသွားတာမျိုး အရက်အလွန်ကျွံသောက်ပြီး စိတ်ဝေဒနာ ဖြစ်တာမျိုး ဂိမ်းကစားလွန်ပြီး ဖြစ်တာမျိုးတွေ မလေးရှားနိုင်ငံမှာ ခဏခဏကြုံတွေ့ရပါတယ်။ဒီလိုကျန်းမာရေး မကောင်းတဲ့အခါ ကိုယ့်အနီးနားက ရပ်ကွက်ဆေးခန်း ကို အရင်ဆုံးပြကြပါ အထောက်အထားမရှိရင်လည်း မကြောက်ပါနဲ့ အရင်ဆုံးပြပါ ဆေးရုံ ကို လွှဲတယ်ဆိုမှ နောက်တစ်မျိုးစဉ်းစားပြီး ဆေးရုံတက်တာမျိုးစီစဉ်ရပါမယ်""လို့နှလုံးလှပရဟိတ လူငယ်များသွေးလှူရှင်အဖွဲ့ မှ ကိုသက်က ပြောပါတယ်။
ယခုသေဆုံးခဲ့တဲ့ မြန်မာအလုပ်သမား မှာ အသက်၃၄နှစ် ရှိပြီ ဖြစ်ကာသူရဲ့ မြန်မာနိုင်ငံ ရှိ နေရပ်မှာ ရန်ကုန်တိုင်းဒေသကြီး လှိုင်သာယာအရှေ့ပိုင်းမြို့နယ် ၅ရပ်ကွက် က ဖြစ်တယ်လို့သိရပါတယ်။
ကွယ်လွန်သူ ကို မလေးရှားနိုင်ငံ ပူချွန်းမြို့သုဿန်ကြီးမှာ ၂၀၂၄ခုနှစ် နိုဝင်ဘာ၁၃ရက် ကွယ်လွန်သူရဲ့ မိတ်ဆွေများနှင့်အတူ နှလုံးလှအဖွဲ့မှကုသိုလ်ယူပို့ဆောင်ပေးခဲ့တယ်လို့သိရပါတယ်။
