မလေးရှားနိုင်ငံ ဆောက်လုပ်ရေး လုပ်ငန်းခွင်မှာ သွားရောက် အလုပ်လုပ်မယ့် သူတွေ အနေနဲ့ မလေးရှားအစိုးရက သတ်မှတ်ထားတဲ့ ဆောက်လုပ်ရေး လုပ်ငန်းဆိုင်ရာ အသိအမှတ် ပြု လက်မှတ်ရရှိမှသာ သွားရောက်အလုပ်လုပ်ခွင့်ရမယ်လို့ စစ်ကောင်စီ အလုပ်သမားဝန်ကြီးဌာန ထံ က သိရပါတယ်။
မလေးရှားအစိုးရအနေနဲ့ လာမယ့် ၂၀၂၅ ခုနှစ် ဇန်နဝါရီလ ၁ ရက် နေ့က စပြီး မလေးရှားနိုင်ငံရှိ ဆောက်လုပ်ရေး လုပ်ငန်း တွေမှာ လာရောက် လုပ်ကိုင်မယ့် မြန်မာအပါအဝင် နိုင်ငံခြားသား လုပ်သားတွေကို ဆောက်လုပ်ရေးလုပ်ငန်းကျွမ်းကျင်မှုလက်မှတ်(SKKP)နဲ့ဆောက်လုပ်ရေး လုပ်ငန်းခွင်ဘေးအန္တရာယ် ကင်းရှင်းရေးသင်တန်း (SICW) တတ်ရောက်ပြီးစီးတဲ့ အသိအမှတ်ပြုလက်မှတ်ရှိမှသာ အလုပ်လုပ်ခွင့် Work permit ထုတ်ပေးမယ်လို့ မလေးရှားနိုင်ငံရှိ မြန်မာသံရုံး ကို အသိပေးအကြောင်းကြားလာတယ်လို့ သိရပါတယ်။
ဆောက်လုပ်ရေးကျွမ်းကျင်မှု ကို အကဲဖြတ်ခြင်း အတွက် အမျိုးအစားအလိုက် မလေးရှားရင်းဂစ် ၇၅၀ မှ ၈၅၀ ရင်းဂစ် အထိ ကုန်ကျမှာ ဖြစ်ကာ ၎င်း ဆောက်လုပ်ရေးကျွမ်းကျင်မှုလက်မှတ်နဲ့ ဆောက်လုပ်ရေး လုပ်ငန်းခွင်ဘေးအန္တရာယ်ကင်းရှင်းရေးသင်တန်း တတ်ရောက်ပြီးစီးခြင်းမရှိဘဲ အလုပ်လုပ်ကိုင်ပါက ၂၀၂၅ခုနှစ် ဇန်နဝါရီ ၁ရက်က စပြီး ပြစ်ဒဏ်ချမှတ် အရေးယူမယ်လို့ အသိပေးချက်မှာဖေါ်ပြထားပါတယ်။
ကိုဗစ်ကာလ နောက်ပိုင်းကစပြီး မလေးရှားနိုင်ငံရှိ ဆောက်လုပ်ရေး လုပ်ငန်း အပါအဝင်အခြား လုပ်ငန်းတွေမှာ မြန်မာအလုပ်သမားတွေဟာ တရားမဝင် ရော တရားဝင်ပါ လာရောက် လုပ်ကိုင်မှုဟာ ယခင်နှစ်တွေ ထက်ပိုများ လာတယ်လို့ မလေးရှားနိုင်ငံမှာရှိတဲ့ မြန်မာအလုပ်သမားတွေထံကသိရပါတယ်။
လက်တလောမှာတော့ မလေးရှားအစိုးရက မြန်မာအပါအဝင် နိုင်ငံခြားသား အလုပ်သမား တွေ ခေါ်ယူတာ ကို ဇွန်လ ၁ ရက်ကစပြီး ယာယီပိတ်ထားကာ ယခုနှစ် ကုန်ပိုင်းမှာ ပြည်ပ လုပ်သား ခေါ်ယူမှု ပြန်စနိုင်ဖွယ်ရှိတယ်လို့ လည်း သတင်းတွေ ထွက်ပေါ်နေပါတယ်။
