မလေးရှား နိုင်ငံ မှာ ယခုလ ၁၀ ရက်အတွင်း အထောက်အထားမပြည့်စုံဘဲ အလုပ်လုပ်နေတဲ့ မြန်မာလုပ်သား ၃၀၀ နီးပါး အဖမ်းခံရတယ်လို့ မလေးရှား လူဝင်မှုကြီးကြပ်ရေးဌာနရဲ့ ထုတ်ပြန်ချက်အရသိရပါတယ်။

 

စက်တင်ဘာ၂ရက် ည မှာ တင် အထောက်အထားမပြည့်စုံတဲ့ လုပ်သား ၂၃၅ ဦး အဖမ်းခံရပြီး စက်တင်ဘာ ၆ ရက်နေ့မှာဖျော်ဖြေစင်တာ KTV မှာ လုပ်ကိုင်နေတဲ့ မြန်မာလုပ်သားအမျိုးသမီး ၂၁ဦး အဖမ်းခံခဲ့ရပါတယ်။

 

ဒါ့အပြင် စက်တင်ဘာ ၈ ရက်နေ့က ဆလန်ဂေါပြည်နယ်ရှိ စားသောက်ဆိုင်တန်း မှာ အလုပ်လုပ်ကိုင်နေတဲ့ မြန်မာ လုပ်သား ၄၁ဦး ကို မလေးရှား အာဏာပိုင်တွေက ဖမ်းဆီးခဲ့ပါတယ်။

 

အခုလို အဖမ်းခံရတာဟာ ပတ်ဝန်းကျင်မှ နေထိုင်သူ နိုင်ငံသားတွေရဲ့ တိုင်ကြားမှုတွေကြောင့် အာဏာပိုင်တွေက ဝင်ရောက်စစ်ဆေး ဖမ်းဆီးခံရတာတွေ များတယ်လို့သိရပါတယ်။

 

""အဖမ်းဆီး အများစုက ပတ်ဝန်းကျင်က တိုင်လို့ ဖမ်းတာများတယ် အထောက်အထားရှိတဲ့ သူတွေက စည်းကမ်းမဲ့ ဆူညံ နေတော့ ဘေးက နိုင်ငံသားတွေ တိုင်ကြတာပေါ့ တချို့ မြန်မာတွေက အရက်မူးပြီး ဆူညံနေကျတာ ဘောက်တွေ ဖွင့်ပြီး သီချင်းဆိုတာတွေရှိတယ် နောက်ဆုံးတော့ အထောက်အထားမရှိတဲ့သူတွေ ခံရတာဘဲ""လို့ မလေးရောက်မြန်မာလုပ်သားတစ်ဦးကပြောပါတယ်။

 

လက်ရှိတွင် မလေးရှားနိုင်ငံ အတွင်း အထောက်အထားမရှိတဲ့ နိုင်ငံခြားသား လုပ်သားတွေ ကို စီမံချက်နဲ့ ဖမ်းစီးနေတဲ့ အတွက် မြန်မာနိုင်ငံသားတွေ အနေနဲ့ စည်းကမ်းရှိစွာနေထိုင်ကြဖို့ မြန်မာလူမှုရေးအဖွဲ့စည်းတွေက အသိပေးပြောကြားတာတွေရှိပါတယ်။

 

မလေးရှား အစိုးရအနေနဲ့ အထောက်အထားမဲ့ နိုင်ငံခြားသားတွေကို ဖမ်းဆီးပြီး လ၀က ဥပဒေအရအရေးယူပြီးနောက် ပြစ်ဒဏ်ကျခံပြီးသူတွေကို မိခင်နိုင်ငံသို့ ပြန်လည်ပို့ဆောင်ခဲ့ရာ ယခုစက်တင်ဘာ ၂ရက်နေ့ကလည်း ဂျိုဟိုး လူဝင်မှုကြီးကြပ်ရေးအကျဉ်းစခန်းမှ မြန်မာလုပ်သား ၃၂ ဦးကို မြန်မာနိုင်ငံသို့ လေကြောင်းနဲ့ ပြန်လည်ပို့ဆောင်ခဲ့တယ်လို့သိရပါတယ်။