ထိုင်းနိုင်ငံ စမွတ်စာခွန်ခရိုင်၊ မဟာချိုင်မြို့နယ်ရှိ ပလက်စတစ်ပရိဘောဂ စက်ရုံတရုံမှာ အကြောင်းမဲ့အလုပ်ရပ်နားခံရတဲ့ မြန်မာအလုပ်သမား (၁၀၀ ကျော်) ဟာ ရုံးဝင်ကာကွယ်ရေးအဖွဲ့ဖြစ်တဲ့ MWSC နှင့် LRF တို့ရဲ့ ကူညီမှုနဲ့ ငွေကြေးအကျိုးခံစားခွင့်စုစုပေါင်း ဘတ် ၁,၂၃၇,၇၁၉ (၁.၂၃ သန်းကျော်) ပြန်လည်ရရှိနိုင်ခဲ့တယ်လို့ အဆိုပါအဖွဲ့ကထုတ်ပြန်ထားပါတယ်။

 

ပြီးခဲ့တဲ့ ဇူလိုင် ၁၅ ရက်နေ့မှာ အလုပ်ရှင်က စက်ရုံကို ချွန်ဘူရီသို့ ပြောင်းရွှေ့မည်ဖြစ်ကြောင်း ကြေညာပြီး၊ မလိုက်ပါသူများအား အလုပ်မှ ထုတ်ပယ်လိုက်တာလို့ သိရပါတယ်။

 

မြန်မာအလုပ်သမားတွေက ဝေါ့ပါမစ်နှင့်ဗီဇာသက်တမ်းတိုးရန် တဦးလျှင် ၇၅၀၀ ဘတ်ပေးထားခဲ့သော်လည်း အလုပ်ထုတ်ခံရတာဖြစ်ပြီး Labour Rights Foundation LRF ကိုတိုင်ကြားပြီးနောက် တာဝန်ရှိအဖွဲ့များနှင့်ပူးပေါင်းကာ တရားမဝင်ဖြစ်ရပ်ကို တိုင်ကြားခဲ့ပါတယ်။

 

ဇူလိုင် ၁၈ ရက်မှာ စာရွက်သက်တမ်းတိုးအတွက် ၅၄၆,၀၀၀ ဘတ် ပြန်လည်ရရှိခဲ့ပြီး ဇူလိုင် ၂၃ ရက်မှာ လုပ်အားခကျန်ငွေ ၆၉၁,၇၁၉ ဘတ် ထပ်မံရရှိခဲ့ပါတယ်။

 

ယခုအထိ လက်ရှိပြန်လည် ရရှိခဲ့သော စုစုပေါင်းငွေမှာ ဘတ် ၁,၂၃၇,၇၁၉ ဖြစ်ပြီး ကျန်ရှိနေသေးတဲ့ နစ်နာကြေးနှင့် ကြိုတင်မပြောခ (နို့တစ်ကြေး) တွေကိုလည်း ရရှိအောင် ဆက်လက်ဆောင်ရွက်ပေးသွားမယ်လို့ LRF ကထုတ်ပြန်ပါတယ်။

Photo-LRF