ထိုင်းနိုင်ငံ ဘန်ကောက်မြို့ ၊ ဘန်စူမြို့နယ်၊ ပါရချူလမ်းမကြီး ၊ ဆွယ်" ၃၇ "အနီးရှိ မြေအောက် ရေမြောင်းသန့်ရှင်းရေး အလုပ် လုပ်သည့် မြန်မာလုပ်သား၂ဦးမှာ ဓါတ်လိုက်ကာသေဆုံးခဲ့တယ်လို့ ထိုင်းသတင်းတွေရဲ့ဖေါ်ပြချက်အရသိရပါတယ်။
မတ်လ ၂၄ ရက် ည ၁၁နာရီ ၅၀ခန့်က မြန်မာအလုပ်သမား ၂ဦး မှာ မြေအောက် လှိုင်ဂူ အတွင်း သန့်ရှင်းရေး ပြုလုပ်စဉ်မှာ ဓါတ်လိုက်ခဲ့ပြီး သေဆုံးခဲ့တာ ဖြစ်တယ်လို့ သိရပါတယ်။
"" မြေအောက် ၁၅မီတာ အနက်မှာ ဖြစ်တာ တစ်ယောက်က ဓါတ်လိုက်တာကို နောက်တစ်ယောက် က သွားကူညီရင်းနဲ့ နှစ်ယောက်လုံး သေဆုံးတယ်လို့ကြားတယ် အခုရက်ပိုင်း မြန်မာအလုပ်သမားတွေ အတွက် စိတ်မကောင်းစရာ သတင်းတွေ ပဲ ခဏခဏ ကြားနေရတယ် ""လို့ ဘန်ကောက်ရှိမြန်မာလုပ်သားတစ်ဦးကပြောပါတယ်။
သေဆုံးသူ မြန်မာလုပ်သား ၂ဦးမှာ ကိုမင်းလွင်ဝင်း အသင်၃၀နှစ်နဲ့ ကိုလင်းနိုင် အသက် ၃၅ နှစ် တို့ ဖြစ်ကာ လုပ်ငန်းခွင် အတွင်း သေဆုံးခဲ့တဲ့ အတွက် ၎င်းတို့ရဲ့ ရသင့်ရထိုက်တဲ့ နစ်နာကြေးတွေ ရရှိဖို့ကျန်ရစ်သူမိသားစုတွေက AACမဟာမိတ်အဖွဲ့ထံ အကူညီတောင်းထားတယ်လို့ သိရပါတယ်။
ပြီးခဲ့တဲ့ မတ်လ၁၅ ရက်ကလည်း ဘန်ကောက်ရှိ ဆောက်လုပ်ဆဲ မိုးပျံ အမြန်လမ်း တံတား ပြိုကျမှုကြောင့် မြန်မာလုပ်သား ၃ဦး သေဆုံး ခဲ့ ပြီး ထိခိုက်ဒဏ်ရာ ရသူတွေ လည်းရှိခဲ့ပါတယ်။
