ထိုင်းနိုင်ငံ တွင် အလုပ်သမား ဘတ်(Work Permit) စာရင်း တင်ရာမှာ အလိမ်ခံလိုက်ရတဲ့ မြန်မာလုပ်သား ၁၄၀၀ကျော် ကို ကူညီဆောင်ရွက်ပေးမယ်လို့ ထိုင်း-မြန်မာ စကားပြန်၊ဘာသာပြန်များအသင်း -TMIA (Thai-Myanmar Interpreter Translator Association ) အဖွဲ့က ဇန်နဝါရီ၂၀ရက်က ထုတ်ပြန်ပါတယ်။
ယခု လတ်တလော တွင် TikTok နဲ့ Facebook လူမှုမီဒီယာ တွေမှာ ပျံနှံနေတဲ့ သတင်းတွေအရ ထိုင်းနိုင်ငံ အတွင်း တရားဝင် နေထိုင်ခွင့် အလုပ်သမားဘတ် (Work permit)ပြုလုပ်ပေးမယ်ဆိုကာ အခကြေးငွေ ယူကာ ဆောင်ရွက်ပေးနေတဲ့ အကျိုးဆောင်အချို့နဲ့ ကုမ္ပဏီ အချို့ ကြားဖြစ်ပွားနေတဲ့ ပြသာနာ အချို့ ကြောင့် မြန်မာလုပ်သား ၁၄၀၀ကျော် မှာ အခက်အခဲ နဲ့ ရင်ဆိုင်နေရတယ်လို့ ဆိုပါတယ်။
ထိုင်းအစိုးရက ၂၀၂၅ ၊ ဒီဇင်ဘာလ ၁၂ ရက်နေ့ မှ ဒီဇင်ဘာလ ၂၆ ရက်အထိ ကို ထိုင်းနိုင်ငံအတွင်းက တရားမဝင် ရွှေ့ပြောင်းအလုပ်သမားတွေကို အား တရားဝင်အလုပ်လုပ်ခွင့်ပေးမယ့် ဘတ်ခေါ် ပန်းရောင်ကဒ် ၊ Work Permit များပြုလုပ်ဖို့ စာရင်းတင်ခွင့်ပေးခဲ့ပါတယ်။
အဆိုပါ အထောက်အထားတွေ ပြုလုပ်ဖို့ အကျိုးဆောင်အချို့နဲ့ ကုမ္ပဏီ ကို နစ်နာသူမြန်မာလုပ်သားတွေ ဟာ ငွေကြေးများ ပေးသွင်း ထားပြီ ဖြစ်ပေမယ့် လိုအပ်တဲ့ စာရွက်စာတမ်း မရရှိခြင်း၊လက်ဗွေနှိပ်ခြင်းနဲ့ သွေးစစ်ခြင်း လုပ်ငန်းစဉ် များ ဆောင်ရွက် နိုင်ခြင်း မရှိဖြစ်နေကာ တာဝန်ရှိသူများကို ဆက်သွယ် သော် လည်း ဆက်သွယ် ၍ မရ ဖြစ်နေတာကြောင့် စိုးရိမ်ပူပန်နေကြရတယ်လို့ သိရပါတယ်။
TMIA (Thai-Myanmar Interpreter Translator Association ) အဖွဲ့အနေနဲ့ သူတပါး လုပ်ငန်း ကိစ္စရပ် တွေ ဝင်ရောက် စွက်ဖက် လိုခြင်းမရှိပေမယ့် ယခုကိစ္စဟာ မြန်မာအလုပ်သမား အများပြားရဲ့ ဘ၀နဲ့ တိုက်ရိုက်သက်ဆိုင်နေတဲ့ လူမှုရေးရိုက်ခတ်မှု ကြီးမား တဲ့ ပြဿနာ ဖြစ်သလို ထိုင်းနိုင်ငံ အတွင်း တရားဝင်နေထိုင် ခွင့်စာရွက်စာ တမ်း ဟာ အလွန်အရေးကြီးပြီး ပိုက်ဆံရှိတိုင်း လုပ်ဆောင်လို့ မရတဲ့ အရာဖြစ်သလို အချိန်နဲ့ အညီ မရရှိပါက အခြား အခွင့်အရေးတွေလည်းဆုံးရှုံးနိုင်တာကြောင့် ကူညီဆောင်ရွက်ပေးဖို့ လုပ်ဆောင်ခြင်း ဖြစ်တယ်လို့ TMIAက ထုတ်ပြန်ထားပါတယ်။
TMIA အဖွဲ့ဟာ နစ်နာဆုံးရှုံးခဲ့ရတဲ့ မြန်မာလုပ်သားများဘက်မှ ခိုင်ခိုင်မာမာရပ်တည်ပြီး ရရှိသင့် တဲ့ အခွင့်အရေးနဲ့ ဥပဒေကြောင်းအရ လိုအပ်တာတွေ ကို တတ်စွမ်းသမျှ ကူညီဆောင်ရွက်ပေးသွားမယ်လို့ ဆိုပါတယ်။
ယခုဖြစ်စဉ်ကြောင့် နစ်နာမှုရှိသူ တွေ ဟာ TMIA ရဲ့ Facebook messenger ကို တိုက်ရိုက်ဆက်သွယ်ပြီး အကူညီ တောင်းခံ နိုင်တယ်လို့ အသိပေး ထုတ်ပြန်ထားပါတယ်။
