ရန်ကုန်တိုင်းဒေသကြီးဗဟန်းမြို့နယ်ကမ္ဘာအေးဘုရားလမ်းက Ooredoo Myanmar Limited မှာ အလုပ်လုပ်နေတဲ့ ဝန်ထမ်း တစ်ဦး မတရား အလုပ် ထုတ်ပယ်ခံရတဲ့ အတွက် အလုပ်သမားဝန်ကြီးဌာနကို တိုင်ကြားထားတယ်လို့ သွေးစည်းညီညွတ်သောသမဂ္ဂများအဖွဲ့ချုပ်မြန်မာ(STUM)မှ သိရပါတယ်။
၎င်းဝန်ထမ်းမှာ FTTH Senior Manager ရာထူးဖြင့် အလုပ်လုပ်နေတဲ့ ဝန်ထမ်းတစ်ဦးဖြစ်ပြီး ကြိုတင်အကြောင်းကြားခြင်းမရှိဥပဒေပါ ရပိုင်ခွင့်များ မပေးဘဲ မတရားအလုပ်မှထုတ်ပယ်ခံခဲ့ရတာဖြစ်တယ်လို့ သိရပါတယ်။
အခုကဲ့သို့အလုပ်ထုတ်ခံရတာနဲ့ ပက်သက်ပြီး အလုပ်သမားဝန်ကြီးဌာနကို တိုင်ကြားခဲ့ရာ အလုပ်သမား ညွန်ကြားရေးဦးစီးဌာနနှင့် အလုပ်သမားရေးရာဆက်ဆံရေးဦးစီးဌာနတို့ပါဝင်သော ပေါင်းစပ်အဖွဲ့ဖြင့် ရုံးချိန်း ၂ ကြိမ် ၊ ဗဟန်းမြို့နယ်ညှိနှိုင်းဖြန်ဖြေရေးအဖွဲ့ဖြင့်ရုံးချိန်း ၃ ကြိမ်၊ အလုပ်သမားညွှန်ကြားရေး ဦးစီးဌာန ဖြင့် ရုံးချိန်း ၁ ကြိမ် စုစုပေါင်း ၆ ကြိမ်ညှိနှိုင်းခဲ့ပေးခဲ့တယ်လို့ ဆိုပါတယ်။
အခုလို ညှိနှိုင်း ပေးခဲ့ပေမယ့် အလုပ်ရှင်အလုပ်သမား ပြေလည်မှု မရရှိသေးတာကြောင့်ဥပဒေနဲ့ အညီ ဆက်လက်လုပ်ဆောင်သွားမယ်လို့သွေးစည်းညီညွတ်သောသမဂ္ဂများအဖွဲ့ချုပ်မြန်မာ(STUM)မှ သိရပါတယ်။
