ထိုင်းနိုင်ငံ၊ချာချင်ဆောင်ခရိုင်၊ဘန်းပကွန်မြို့နယ်အတွင်းရှိ အီလက်ထရောနစ်စက်ရုံတစ်ခုမှာ အလုပ်လုပ်ကိုင်နေတဲ့ မြန်မာ အလုပ်သမား ၅၀ကျော်ကို အလုပ်ဝင်ပြီး ၈လခန့်မှာပင် အလုပ်ရှင်မှ ကြိုတင်အကြောင်း မကြားဘဲ အလုပ်မှ ထုတ်ပယ်တာခံလိုက်ရတယ်လို့ ၎င်းကိစ္စကို ကူညီပေးနေတဲ့ WAGအလုပ်သမား မဟာမိတ်အဖွဲ့ ထံ မှ သိရပါတယ်။
မြန်မာအလုပ်သမား အမျိုးသား ၄ဦး၊အမျိုးသမီး၅၀ဦးတို့ဟာ ၎င်းစက်ရုံမှာ အလုပ်လုပ် နိုင်ဖို့ ကြားစပ်ကုမ္ပဏီ နဲ့ စမတ်ခ ၈၅၀၀ဘတ်မှ ၁၀၅၀၀ ဘတ်အကြား ဝန်ဆောင်ခ ပေး၍ အလုပ်ဝင်ခဲ့ကျရပြီး လုပ်သက်၂လမှ ၈လ အထိ သာရှိသေးတယ် လို့ ဆိုပါတယ်။
၂၀၂၅ခုနှစ် ဒီဇင်ဘာ ၂၁ရက်မှာ စက်ရုံ ဘက်မှ အော်ဒါ မရှိသဖြင့် လူအနည်းငယ် အခြားရုံ သို့ ပြောင်းရွှေ့ရမယ်လို့ ဆိုကာ ဒီဇင်ဘာ၂၃ရက်မှာတော့ ပြောင်းရမယ့် လုပ်သားတွေရဲ့ နာမည်စာရင်း ထွက်လာပြီး ၂၀၂၆ခုနှစ် ဇန်နဝါရီ ၃ရက်နေ့မှာ ပြောင်းရွှေ့ လုပ်ရမယ်လို့စက်ရုံဘက်မှ ပြောကြားခဲ့တယ်လို့ WAGအဖွဲ့ မှ သိရပါတယ်။
သို့သော်လည်း ဇန်နဝါရီ ၅ရက် အထိ မပြောင်းပေးတာကြောင့် သွားရောက် မေးကြည့် တဲ့ အခါမှ စက်ရုံ တွင် အော်ဒါ မရှိတဲ့ အတွက် အလုပ်မှ ထုတ်ပယ်လိုက်တယ်လို့ ပြောကြားခဲ့တယ်လို့ သိရပါတယ်။
အခုလို အလုပ်သမားတွေကို အပြစ်မရှိဘဲ စက်ရုံဘက်မှ ကြိုတင်အကြောင်းကြားခြင်း မရှိ အလုပ်မှ ထုတ်ပယ်လိုက်တာကြောင့် အလုပ်လက်မဲ့ ဖြစ်သွားတဲ့ အပေါ် ကြားစပ်ကုမ္ပဏီ ကလည်း တာဝန်ယူ မဖြေရှင်းပေးဘူးလို့ ဆိုပါတယ်။ဒါ့အပြင် ကြားစပ်ကုမ္ပဏီက ကျန့်ခေါက်ထားပေးခြင်း မရှိတာကြောင့် ကျန့်အော်များ သက်တမ်းကုန် သွားတဲ့ အတွက် မြန်မာလုပ်သားတွေ မှာ နစ်နာမှု များစွာ ဖြစ်ပေါ်နေတယ်လို့ သိရပါတယ်။
မြန်မာလုပ်သားတွေအနေနဲ့မိမိတို့ရဲ့ နစ်နာမှု တွေ အတွက် ထိုက်သင့်တဲ့ နစ်နာကြေး ရလို တာကြောင့် ထိုင်းရောက် မြန်မာလုပ်သားအရေး ကူညီပေးနေတဲ့ WAGအလုပ်သမား မဟာမိတ်အဖွဲ့ ထံ အကူညီတောင်းခံလာတဲ့ အတွက် WAGအဖွဲ့ အနေနဲ့ ဇန်နဝါရီ ၅ရက်မှာ အမှု ကို လက်ခံခဲ့ကာ ကူညီဆောင်ရွက်ပေးနေတယ်လို့ သိရပါတယ်။
