ပြည်ပ ကနေ ခွင့် ပြန်လာတဲ့ အလုပ်သမားတွေ အနေနဲ့ ခွင့်ရက်စေ့ကာ သက်ဆိုင်ရာ နိုင်ငံ ကို ပြန်လိုပါက အလုပ်သမားဝန်ကြီးဌာနရဲ့ ခွင့်ပြုချက် ရယူရမယ် လို့ စစ်ကောင်စီရဲ့ အလုပ်သမားဝန်ကြီးဌာနက အသိပေးထုတ်ပြန်လိုက်ပါတယ်။
PJ နိုင်ငံကူးလက်မှတ် နဲ့ ပြည်ပနိုင်ငံများသို့ ထွက်ခွာမည့် သူတွေ အတွက် အသိပေးချက် ကို မတ်လ ၁၁ ရက် က စစ်ကောင်စီရဲ့ အလုပ်သမားဝန်ကြီးဌာနက ထုတ်ပြန်ခဲ့ပါတယ်။
၎င်း အသိပေးချက်မှာ PJနိုင်ငံကူးလက်မှတ်နဲ့ ပြည်ပအလုပ်အကိုင်အလုပ်သမားသက်သေခံကတ်(OWIC) လက်ဝယ်ရှိသူတွေဟာ အေဂျင်စီ အစီစဉ်နဲ့သော်လည်းကောင်း မိမိအစီအစဉ် (ကျွမ်းကျင်) ဖြင့်သော်လည်းကောင်း၊ ခွင့်ပြန်လာပြီး ခွင့်ရက်စေ့ကာ ပြန်လိုခြင်း ကြောင့် လည်းကောင်း ပြည်ပနိုင်ငံ များ သို့ ထွက်ခွာမယ်ဆိုပါက အလုပ်သမားဝန်ကြီးဌာန ကို လိုအပ်တဲ့စာရွက်စာတမ်းတွေ နဲ့အတူ အွန်လိုင်းကတစ်ဆင့် (migrantdeparture @gmail.com)ကို ပေးပို့ လျှောက်ထားပြီး ပြည်ပကိုသွားရောက်အလုပ်လုပ်ဖို့ ခွင့်ပြုချက်ရယူရမယ်လို့ အသိပေးထားပါတယ်။
ဒါ့အပြင် တောင်ကိုရီးယား နိုင်ငံ မှာ EPSစနစ် နဲ့ သွားရောက် အလုပ်လုပ်ကိုင်ပြီး မြန်မာနိုင်ငံ ကို ခွင့်ဖြင့် ပြန်လာတဲ့ အလုပ်သမားတွေ အနေနဲ့ POEAရုံးကို မပျက်မကွက် သတင်းပေးပို့ရမယ်လို့ အလုပ်သမားဝန်ကြီးဌာနရဲ့ အစိုးရပြည်ပအလုပ်အကိုင်အေဂျင်စီက အသိပေးကြေညာထားပါတယ်။
ခွင့်နဲ့ ပြန်လာ တဲ့ အလုပ်သမားရဲ့ နိုင်ငံကူးလက်မှတ်၊သက်တမ်းရှိသည့်ပြည်ပအလုပ်ကိုင်အလုပ်သမားသက်သေခံကတ်(OWIC)၊ သက်တမ်းရှိ အလုပ်လုပ်ခွင့် ပါမစ်(ID Card)၊အလုပ်ရှင်မှ ခွင့်ဖြင့် နေရပ် သို့ ပြန်ရန်ခွင့်ပြုစာ တို့ကို မပြန်ခင် အနည်းဆုံး ရုံးပိတ်ရက်မပါ ၅ရက် ကြိုတင် သတင်းပို့ရမယ်လို့ အသိပေးထားပါတယ်။
ပေးပို့လာတဲ့ အချက်အလက်တွေကို ဝန်ကြီးဌာနက စိစစ်ပြီး ပြည်ပကို သွားရောက် အလုပ်လုပ်ကိုင်ရန်အတွက် ခွင့်ပြုတဲ့စာရင်း ကို Safe Migration Telegram Channel ကနေကြေညာပေးမှာ ဖြစ်ပြီး သက်ဆိုင်ရာ လေဆိပ် များ သို့ လည်း ပေးပို့ထားမယ်လို့ ဆိုပါတယ်။
ယခု လုပ်ငန်းစဉ်ကို ၂၀၂၅ခုနှစ် မတ်လ ၁၇ရက် က စပြီး ဆောင်ရွက်သွားမယ်လို့ သိရပါတယ်။
