ပြည်ပအလုပ်အကိုင် အေဂျင်စီ ၁၆ ခုက သတ်မှတ်ရက်အတွင်း ဒဏ်ကြေးပေးဆောင်မှုမရှိလို့ဟုဆိုကာ ၎င်းကုမ္ပဏီများကို လစဉ်ဒဏ်ကြေး ကျပ် တစ်သိန်းနှုန်း တိုးမြှင့်ကောက်ခံမယ်လို့ စစ်ကောင်စီ အလုပ်သမားဝန်ကြီးဌာနက ထုတ်ပြန်လိုက်ပါတယ်။
အလုပ်သမားဝန်ကြီးဌာနအနေနဲ့ အခွန်ပေးဆောင်ခြင်းမရှိတဲ့ကုမ္ပဏီများနဲ့ ပြည်ပအလုပ်အကိုင်အေဂျင်စီ ၁၂၃ ခုကို အလုပ်ခေါ်စာအသစ် တင်ပြမှု ဆိုင်းငံ့ လိုက်ပြီးအဲ့ဒီထဲက ဌာနရဲ့ညွှန်ကြားချက်တွေကို အပြည့်အဝလိုက်နာမှာမရှိတဲ့အေဂျင်စီ၁၆ခုကို ဒဏ်ကြေးလစဉ်တပ်ဖို့ကိုပါ ထုတ်ပြန်လိုက်တာလို့ဆိုပါတယ်။
" ပြည်တွင်းက နေ ပြည်ပအလုပ်အကိုင်ဝန်ဆောင်မှု ပေးနေတဲ့အေဂျင်စီအရေအတွက် ၆၀၀ ကျော်ရှိတဲ့အထဲမှာ ၁၀၀ ကျော်လောက်က အလုပ်သမားဝန်ကြီးဌာနရဲ့ သတ်မှတ်ချက်တွေနဲ့အလုပ်သမားစာရင်းတောင်းခံလွှာတွေကိုမတင်ပြနိုင်လို့ လုပ်ငန်းရပ်ထားဖို့ အလုပ်ခေါ်စာအသစ်တင်ပြတာဆိုင်းငံ့ဖို့တွေ ပြောလာတာရှိတယ်။လက်ရှိမှာကပြည်ပအလုပ်အကိုင်အေဂျင်စီတွေလည်းအတော်အကျပ်ရိုက်ကြတယ်။သူတို့စေလွှတ်လိုက်တဲ့လုပ်သားရဲ့မိသားစုထံပြန်ပို့ငွေကို ပို့လားမပို့လားအဲ့လိုတွေအေဂျင်စီကစာရင်းကောက်ပြီးဌာနကိုတင်ပြရတာကလွယ်မနေဘူး။အချို့လည်းအေဂျင်စီကိုယ်တိုင်ကငွေစိုက်ထုတ်ပြီးပြန်တင်ပြပေးနေတာတွေလည်းရှိတယ်။အခုလည်းအေဂျင်စီ၁၆ခုကို သတ်မှတ်ရက်အတွင်းသူတို့တပ်ထားတဲ့ဒဏ်ကြေးပေးဆောင်တာမရှိလို့ လစဉ်ဒဏ်ကြေးတိုးကောက်ဖို့ပြောထားတယ်။ဘယ် အေဂျင်စီ တွေကို ကောက်တာလဲ ဆိုတာတော့နာမည်တွေဖော်ပြမထားသေးဘူး။အခုတောင်အချို့တွေပြည်ပအလုပ်အကိုင်အေဂျင်စီလုပ်ငန်းကိုမလုပ်ချင်ကြတော့တာအခုလိုဒဏ်ကြေးတွေလစဉ်တပ်နေရင်တော့အနှေးနဲ့အမြန်ပဲ လုပ်ငန်းပိတ်သိမ်းကုန်လိမ့်မယ်"လို့ ပြည်ပအလုပ်အကိုင်အေဂျင်စီ လုပ်ငန်းလုပ်ကိုင်နေသူတစ်ဦးကပြောပါတယ်။
အလုပ်ခေါ်စာအသစ်တင်ပြခွင့် ဆိုင်းငံ့ထားတဲ့
ပြည်ပအလုပ်အကိုင်အေဂျင်စီ ၁၂၃ ခုအနေနဲ့ ဒဏ်ကြေးများ ပေးသွင်းခြင်း၊ အခွန်ပေးဆောင်ခြင်းများ ပြုလုပ်ပြီးမှသာ အလုပ်ခေါ်စာအသစ် တင်ပြခွင့်ပြုမှာဖြစ်ကြောင်း သိရပါတယ်။
အလုပ်သမား စေလွှတ်လချုပ်စာရင်းများကို အလုပ်သမား စေလွှတ်နိုင်ခြင်း ရှိသည် ဖြစ်စေ၊ မရှိသည်ဖြစ်စေ လကုန်ပြီး ၁ ရက် အတွင်း ပုံမှန်ပေးပို့ရမည်ဖြစ်ကြောင်း၊ မိသားစု လွှဲပို့ငွေစာရင်းများ လချုပ်ပေးပို့ရာတွင်လည်း မိသားစုလွှဲပို့ငွေအထောက်အထား ရရှိသည်ဖြစ်စေ၊ မရရှိသည်ဖြစ်စေ လကုန်ပြီး ၅ ရက် အတွင်း ပုံမှန်ပေးပို့ရမှာ ဖြစ်ကြောင်းနဲ့ သတ်မှတ်ရက်အတွင်း ပေးပို့ခြင်းမရှိပါက ဒဏ်ကြေးနဲ့ Demand letter အသစ် တင်ပြ ခွင့် ဆိုင်းငံ့ခံရမည်ဖြစ်ကြောင်းလည်းအလုပ်သမားဝန်ကြီးဌာနရဲ့ ထုတ်ပြန်ချက်မှာ ဖော်ပြထားတယ်လို့သိရှိရပါတယ်။
