ပြည်ပနိုင်ငံတွေမှာ ရွှေ့ပြောင်းလုပ်ကိုင်သူတွေအနေနဲ့ လုပ်ငန်းခွင်တွင်းမှာ ချိုးဖောက်ခံရတာတွေ၊ ဖမ်းဆီးထိန်းသိမ်းခံရပြီး မိသားစုနဲ့ ပြန်လည်ဆက်သွယ်လိုသူတွေအပါအဝင် ပြည်ပနိုင်ငံတွေမှာ အခက်အခဲတွေ ဖြစ်ပေါ်နေတဲ့ အလုပ်သမားတွေအနေနဲ့ ဆက်သွယ်အကူအညီ တောင်းခံနိုင်တယ်လို့ မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချူပ် (CTUM) ရွှေ့ပြောင်း အလုပ်သမားဌာန၊ လက်ထောက်ဌာနမှူး ဦးဟိန်းလတ်က ပြောပါတယ်။
လက်ရှိမှာ မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချူပ် (CTUM) အနေနဲ့ အာဆီယံနိုင်ငံတွေမှာရှိတဲ့ အလုပ်သမားသမဂ္ဂတွေနဲ့ တရားဝင်လက်မှတ်ရေးထိုးထားပြီး ဒုက္ခရောက်နေတဲ့ ရွှေ့ပြောင်းအလုပ်သမားတွေကို လက်ခံနိုင်ငံတွေက အပြန်အလှန်ကူညီပေးရေးကို သဘောတူညီချက်ရှိထားတာ ဖြစ်ပါတယ်။
“၂၀၂၄ ခုနှစ်ထဲမှာတော့ ကျွန်တော်တို့ကူညီပေးထားတာ လူ(၅၀၀) ကျော် ရှိပါတယ်။ နိုင်ငံတွေကလည်း အစုံပါပဲ။ ထိုင်းနိုင်ငံကတော့ အများဆုံးပါပဲ။ မလေးရှားနိုင်ငံ၊ တရုတ်နိုင်ငံ၊ အရှေ့အလယ်ပိုင်းဒေသတွေကလည်း ဆက်သွယ်အကူအညီ တောင်းခံကြတာ ရှိပါတယ်။ ကျွန်တော်တို့ CTUM MRC Facebook ကနေပဲဖြစ်ဖြစ် ကျွန်တော်တို့ hotline ဖုန်းတွေကဖြစ်ဖြစ် ဆက်သွယ် အကူအညီတောင်းခံလို့ ရပါတယ်။ကျွန်တော်တို့ တက်နိုင်သလောက်ကူညီသွားမှာပါ။”လို့ ဦးဟိန်းလတ်က ပြောပါတယ်။
စစ်အာဏာသိမ်းပြီးနောက်မှာ ကျေးရွာတွေ၊နေအိမ်တွေ မီးရှို့ခံရတာတွေအပြင် အကြောင်းအမျိုးမျိုးနဲ့ အပြစ်ရှာ ဖမ်းဆီးတာ၊ မဖြစ်မနေ စစ်မှုထမ်းခိုင်းတာစတဲ့ အခြေအနေတွေကြောင့်လည်း လူငယ်အများစုဟာ တရားဝင် ဖြစ်စေ၊ တရားမဝင်ဖြစ်စေ ပြည်တွင်းက ထွက်ခွာနှုန်း မြင့်တက်လာတာပဲ ဖြစ်ပါတယ်။
“အခုက ချိုးဖောက်မှုတွေ အရမ်းများလာတယ်။ ဒါပေမယ့် အရေးယူတာက တော်တော်နည်းလာတယ်။ အရင် ကဆို အေဂျင်စီအဖွဲ့ချုပ်နဲ့ ရွှေ့ပြောင်းလုပ်သားကူညီပေးရေးအဖွဲ့တွေ ပူးပေါင်းကူညီပေးတာတွေလည်း အား ကောင်းတယ်။ အသိပညာပေးတာတွေ၊ အကူအညီပေးတာကောပေါ့။ အခုကျ ကျွန်မတို့လည်း ကူညီပေးရတာတွေ ကန့်သတ်ချက်တွေ ရှိလာတယ်”လို့ ပြည်တွင်းမှာ နေထိုင်တဲ့ အလုပ်သမားအရေးကူညီပေးနေသူတစ်ဦးက ပြောပါတယ်။
စစ်ကောင်စီလက်အောက်ခံ အလုပ်သမားဝန်ကြီးဌာနဟာ ရွှေ့ပြောင်းလုပ်သားတွေ သတ်မှတ်ဝန်ဆောင်ခထက် ပိုမိုပေးချေနေရတာတွေ၊ လုပ်ငန်းခွင်တွင်းမှာ ချိုးဖောက်ခံနေရတာတွေ၊ MOU စာချုပ်ပါအတိုင် ခံစားခွင့်မရတာ တွေ ရှိနေတာကို ထိရောက်စွာဖြေရှင်းပေးမှု မရှိဘဲ အလုပ်သမားတွေဆီက နိုင်ငံခြားငွေရရှိရေးကိုစာ အားစိုက်လုပ်ဆောင်နေပါတယ်။
