ပြည်ပကိုအလုပ်သမားစေလွှတ်နေတဲ့အေဂျင်စီတွေရဲ့ အလုပ်ခေါ်စာအသစ်(Demand Letter) လျှောက်တင်လာတဲ့အပေါ် အလုပ်သမားဦးရေကန့်သတ်ချက်နဲ့သာ စစ်ကောင်စီက ခွင့်ပြုပေးမယ်လို့ မြန်မာပြည်ပအလုပ်အကိုင်ဝန်ဆောင်မှု လုပ်ငန်း အေဂျင်စီတွေထံက သိရပါတယ်။

လက်ရှိခွင့်ပြုထားပြီးဖြစ်တဲ့ အလုပ်ခေါ်စာတွေကိုတော့ စေလွှတ်ခွင့်တွေပြုလုပ်ပေးမှာဖြစ်သလို ပင်လုံခန်းမမှာ ၃၀-၁-၂၀၂၅ ရက်နေ့မတိုင်မီက အလုပ်ရှင် အလုပ်သမားသဘောတူ စာချုပ်ချုပ်ဆိုပြီး ထိုင်းနိုင်ငံသို့ထွက်ခွာမဲ့အလုပ်သမား တွေနဲ့ အခြားသောနိုင်ငံတွေအတွက် Demand Letter မှန်ကန်မှုရှိကြောင်း စစ်ဆေးပြီးတဲ့ အလုပ်ခေါ်စာတွေကို စေလွှတ်ရေးလုပ်ငန်းစဉ်များဆက်လက်ဆောင်ရွက်ခွင့်ပြုထားတယ်လို့ သိရပါတယ်။

၃၀.၁.၂၀၂၅ နောက်ပိုင်းမှာတော့ အေးဂျင့်တွေတစ်ခုချင်းစီလိုက် တင်ပြလာတဲ့ Demand letter အသစ်တွေ ကိုတော့ အေးဂျင့်စီတစ်ခုလျှင် ကန့်သတ်လူဦးရေ ဖြင့်သာစစ်ကောင်စီက ခွင့်ပြုတော့မှာဖြစ်သလို သေချာစိစစ်ပြီး အေးဂျင့်စီတစ်ခုချင်းစီအလိုက် ခွင့်ပြုချက်ကိုဌာနဆိုင်ရာကပြန်လည်အကြောင်းကြားပေးမှာလို့ သိရပါတယ်။

"အရင်လက်စတွေကိုအစဉ်လိုက် အရင်ခွင့်ပြုမယ်။ အကုန်ထွက်ရမယ်။ နောက်လာမဲ့အသစ်တွေကိုတော့ ကန့်သတ်လူဦးရေနဲ့ခွင့်ပြုမယ်။ Demand တ

စောင်ကိုနှစ်ဝက်လောက်ထိကြာနိုင်မဲ့အနေအထားရှိတယ်။ အဲလိုကြာမယ်ဆိုရင်တော့ ဘယ်သူဌေးကမှခေါ်မှာမဟုတ်တော့ဘူး။ Demand များများကိုင်တဲ့ အေဂျင်စီ တွေအတွက် ခက်ခဲနိုင်တယ်"လို့ ပြည်ပအလုပ်အကိုင်အေဂျင်စီ လုပ်ကိုင်သူတစ်ဦးကဆိုပါတယ်။

အဲ့ဒီ အလုပ်အသစ်အတွက် Demand letter အသစ်တင်ပြလျှောက်ထားခွင့်ကိုလည်း စစ်ကောင်စီက ယခင်ကခွင့်ပြုထားပြီးဖြစ်တဲ့ စေလွတ်ရန် ကျန်ရှိနေတဲ့အလုပ်သမားအားလုံး စေလွတ်ပြီးစီးမှသာ Demand letter အသစ်တင်ပြလျှောက်ထားနိုင်မှာလို့ သိရပါတယ်။

စစ်ကောင်စီရဲ့အလုပ်သမားဝန်ကြီးဌာနက စေလွှတ်ခွင့်ကျပြီးတဲ့အလုပ်သမားတွေကို ပြီးခဲ့တဲ့ဖေဖော်ဝါရီ လလယ်ပိုင်းကစပြီး ပြည်ပအလုပ်အကိုင်အလုပ်သမားသက်သေခံကတ်(OWIC)ထုတ်ပေးတဲ့လုပ်ငန်းစဉ်ကို ရက်အကန့်အသတ်မရှိ ရုတ်တစ်ရပ်ရပ်နားခဲ့တာကြောင့် အလုပ်သမားတွေထွက်ခွင့်မရဘဲ ပိတ်မိနေခဲ့ကြတာဖြစ်ပါတယ်။

အဲဒီအတွက် မတ် ၂၀ ရက်ကစပြီး OWIC ကတ် ပြန်ထုတ်ပေးသွားမယ်လို့ ထုတ်ပြန်ထားပြီး စေလွှတ်ရန်ကျန်ရှိတဲ့ အလုပ်သမားအားလုံးစေလွှတ်ပြီးစီးမှသာ အေဂျင်စီတွေဟာ Demand letter အသစ်တင်ပြလျှောက်ထားရမှာဖြစ်ပြီး လူဦးရေ ကန့်သတ်ချက်နဲ့ခွင့်ပြုပေးတော့မှာပဲဖြစ်ပါ တယ်။