ထိုင်းနိုင်ငံ အတွင်း အကြောင်း အမျိုးမျိုးကြောင့် ပြစ်ဒဏ်ကျခံ ခဲ့ရတဲ့ မြန်မာ အလုပ်သမား ၁၈၃ ဦး ကို နိုဝင်ဘာ ၂၈ ရက်က ထိုင်းအာဏာပိုင်တွေ က မြန်မာ ဘက်ကို ပြန်လည် ပို့ဆောင်ပေးခဲ့တယ်လို့ ရနောင်းခရိုင်လူဝင်မှုကြီးကြပ်ရေးနှင့်ပြန်ကြားရေးဌာန ရဲ့ ထုတ်ပြန်မှု အရသိရပါတယ်။ 

၎င်း မြန်မာအလုပ်သမား ၁၈၃ ဦး ကို  ရနောင်းတောမောရုံးအချုပ် အတွင်း ကနေ ထိုင်းနိုင်ငံဆိုင်ရာမြန်မာသံရုံးမှ အကူတာဝန်ခံဦးမိုးဇော်နှင့် ထိုင်းဘက်မှသက်ဆိုင်ရာဌာနတာဝန်ရှိသူများပူးပေါင်းကာ   ရနောင်းမြို့ပန်နာရပ်ကွက်ရှိ စူလ်ကာကော်လှေဆိပ်မှတစ်ဆင့် ကော့သောင်းမြို့သို့ ပို့ဆောင်ပေးခဲ့တယ်လို့ ဆိုပါတယ်။ 

""အိမ်ကို ဘေးကင်းစွာနဲ့ ပြန်ရောက်ပါစေ လို့ ဆုတောင်းပေးနေရတယ် ကိုယ့်နိုင်ငံသားတွေ အချုပ်ထောင်က လွတ် လာပေမယ့် မပျော်နိုင်သေးဘူးကိုယ်ရဲ့ မိသားစု ဆီကို ဘေးကင်းစွာ ရောက် ဖို့ ကို စိုးရိမ်နေရသေးတယ် အခု ရနောင်း အချုပ်ထောင်ထဲ မှာလဲ အကြောင်းအမျိုးမျိုးနဲ့ အဖမ်းခံထားရတဲ့ မြန်မာအလုပ်သမားတွေ အတော်များတယ် အချုပ်ခန်းထဲ ပြည့်လျှံ နေလို့ မြန်မာ ဘက်ကို မြန်မြန် ပို့ နိုင်အောင် ထိုင်းအာဏာပိုင်တွေဘက်က လုပ်နေကြတယ်""လို့ရနောင်းမြို့ရှိ မြန်မာအလုပ်သမားတစ်ဦးကပြောပါတယ်။ 

ပြီးခဲ့တဲ့ နိုဝင်ဘာ ၁၃ ရက်က လည်း
ထိုင်းနိုင်ငံ အတွင်း အကြောင်းအမျိုးမျိုးနဲ့ ပြစ်ဒဏ် ကျခံ ရ တဲ့ မြန်မာအလုပ်သမား ၁၈၆ ဦး ကို ထိုင်းအာဏာပိုင်တွေက မြန်မာဘက် ကော့သောင်း မြို့ကို ပြန်ပို့ပေးခဲ့တယ်လို့ သိရပါတယ်။