ထိုင်းနိုင်ငံအတွင်း အကြောင်းအမျိုးမျိုးနဲ့ ပြစ်ဒဏ်ကျခံပြီး တဲ့ မြန်မာနိုင်ငံသား ၉၆ ဦး ဇွန်လ ၃၀ ရက်မှာ ထိုင်းအာဏာပိုင်တွေက မြန်မာနိုင်ငံ ကော့သောင်းဘက် ပြန်ပို့ လိုက်တယ်လို့ ရနောင်းမြို့ လူဝင်မှုကြီးကြပ်ရေးရုံးထုတ်ပြန်ချက်အရသိရပါတယ်။

 

၂၀၂၅ ခုနှစ် ဇွန်လ အတွင်း ပြစ်ဒဏ်ကျခံပြီးတဲ့ မြန်မာနိုင်ငံသားတွေကို နေရပ် ပြန်ပို့တာ ဟာ ယခုအကြိမ်ဟာ ဒုတိယအကြိမ် ဖြစ်ပါတယ်။

ဇွန်လ ၂၅ရက်က လည်း မြန်မာနိုင်ငံသား အမျိုးသား ၁၀၄ ဦးနဲ့အမျိုးသမီး၂၇ ဦး တို့ကို မြန်မာဘက်သို့ ပြန်လည် လွှဲပြောင်းပေးခဲ့ပါတယ်။

မြန်မာနိုင်ငံသားတွေ နေရပ်ပြန်ပို့တာမှာ ရနောင်းခရိုင် လဝက အရာရှိတွေနဲ့ အတူ ရနောင်းတာဝန်ခံမြန်မာအလုပ်သမား သံအရာရှိဦး‌မိုးဇော်ပါ လာရောက် ဆောင်ရွက်ပေးတယ်လို့ သိရပါတယ်။

 

အခုလို ပြစ်ဒဏ်ကျခံပြီး လို့ နေရပ်ပြန်ပို့ခံရတဲ့ မြန်မာနိုင်ငံသားတွေကို စစ်ကောင်စီက စစ်မှုထမ်းဖို့ အဓမ္မ ခေါ်ဆောင်တာတွေ လုပ်ဆောင်နေတယ်လို့ အဓမ္မစစ်မှုထမ်းရန်ခေါ်ဆောင် ရာ ကနေ ထွက်ပြေးလွတ်မြောက်လာသူတွေထံမှသိရပါတယ်။

 

ထိုင်းနိုင်ငံ မှ ပြစ်ဒဏ်ကျခံရပြီးတဲ့ မြန်မာနိုင်ငံသားတွေ ကို နေရပ်ပြန်ပို့တာမှာ ယခု၂၀၂၅ခုနှစ် အတွင်း ၇ကြိမ်ရှိပြီး ပြန်ပို့ခံရသူဦးရေ ၁၁၀၀ ကျော်ရှိကာ အများစုမှာ အမျိုးသား တွေ အများဆုံးပါဝင်တယ်လို့ သိရပါတယ်။