မြန်မာနိုင်ငံသား မိဘ တွေကနေ နိုင်ငံပြင်ပမာ ကလေး မွေးဖွားပါက မွေးဖွားကြောင်း မှတ်ပုံတင်ဖို့ လိုအပ်တဲ့ အထောက်အထားအချက်အလက်တွေကို ဂျပန်နိုင်ငံ၊ တိုကျိုမြို့၊ မြန်မာသံရုံးက ဇူလိုင်၁၀ ရက် မှာ ထုတ်ပြန်ပါတယ်။

 

နိုင်ငံ ပြင်ပမှာ မွေးဖွားတဲ့ ကလေးတွေ အတွက် မွေးဖွားကြောင်း မှတ်ပုံတင်ခြင်း ကို မြန်မာနိုင်ငံသားဆိုင်ရာ လုပ်ထုံးလုပ်နည်းနဲ့ အညီ မွေးဖွားပြီး တစ်နှစ်အတွင်း မြန်မာသံရုံးမှတစ်ဆင့် မှတ်ပုံတင် ခြင်းကို ဦးစွာလျှောက်ထား ဆောင်ရွက်ရမယ်လို့ သံရုံးက ထုတ်ပြန်ထားပါတယ်။

 

ထိုသို့ မှတ်ပုံတင်ဆောင်ရွက်ရာ မှာလည်း မြန်မာနိုင်ငံသား မိဘနှစ်ပါး မှာ နိုင်ငံသား စိစစ်ရေးကတ်ပြား ကိုင်ဆောင်သူ များဖြစ်ရန်လိုအပ် တယ်လို့ ဆိုပါတယ်။

 

မိဘများ မှာ အမျိုးသားမှတ်ပုံတင်သက်သေခံကတ်ပြား ကိုင်ဆောင်သူများဖြစ်ပါက နိုင်ငံသား စိစစ်ရေးကတ်ပြား ကို ဥပဒေနှင့်အညီ လဲလှယ်ကိုင်ဆောင်ပြီးမှသာ ကလေးမွေးဖွားမှု မှတ်ပုံတင်ခြင်းကို ဆောင်ရွက်နိုင်မှာ ဖြစ်တယ်လို့ အသိပေးထားပါတယ်။

 

နိုင်ငံတော်ပြင်ပ မှာ ကလေးမွေးဖွားကြောင်းကို မြန်မာသံရုံးမှတဆင့် လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန မှာ မှတ်ပုံတင်ပြီးမှသာ ကလေးများအတွက် နိုင်ငံကူးလက်မှတ်လျှောက်ထားခြင်းကို ဆက်လက်ဆောင်ရွက်နိုင်မယ်လို့ မြန်မာ သံရုံး က ကြေညာထားပါတယ်။