မြန်မာနိုင်ငံသားတွေ အပါအဝင် နိုင်ငံခြားသားလုပ်သားတွေ အနေနဲ့ ထိုင်းနိုင်ငံ အတွင်း အလည်ဗီဇာနဲ့ နေထိုင်ပြီး အလုပ် လုပ်ကိုင်တာ၊ အွန်လိုင်း ဈေးရောင်းတာတွေ စစ်ဆေးတွေ့ရှိပါက ပြည်နှင်ဒဏ်ပေးမယ်လို့ ထိုင်းအလုပ်သမားဝန်ကြီးဌာနက သတိပေးထုတ်ပြန်ထားပါတယ်။
အလုပ်လုပ်ကိုင်ခွင့်ပါမစ်မရှိဘဲ အွန်လိုင်းကနေ Live လွှင့် ဈေးရောင်းတာကို စစ်ဆေးတွေ့ရှိပါက ဘတ် ၅,၀၀၀ ကနေ ဘတ် ၅၀,၀၀၀ အထိ ဒဏ်ငွေပေးဆောင်ရမယ့် အပြင် အလုပ်လုပ်ကိုင်ခွင့် ၂ နှစ် ပိတ်သိမ်းကာ နေရပ်သို့ ပြန်လည်ပို့မယ်
လို့ ဆိုပါတယ်။
ပြီးခဲ့တဲ့ ဇွန်လ ၁၂ရက် က ဘန်ကောက်မြို့ရှိ ကုန်တိုက်တစ်ခုမှာ အလည်ဗီဇာ ကိုင်ဆောင်ပြီး liveလွှင့် ဈေးရောင်းချနေတဲ့ တရုတ်နိုင်ငံသား ၁၃ဦး ကို ဖမ်းဆီးခဲ့တယ်လို့ ထိုင်းအလုပ်သမားဝန်ကြီးဌာနက ထုတ်ပြန်ထားပါတယ်။
အဲဒီ တရုတ်နိုင်ငံသား တွေ ကို ထိုင်းဥပဒေအရ အရေးယူပြီးစီးတာနဲ့ ဗီဇာပိတ်သိမ်းပြီး နေရပ်နိုင်ငံဆီ ပြန်လည်ပို့ဆောင်သွားမယ်လို့ သိရပါတယ်။
အလုပ်လုပ်ကိုင်ခွင့် ပါမစ်မရှိတဲ့ အလုပ်သမားတွေကို ငှားရမ်းခိုင်းစေတဲ့ အလုပ်ရှင်ကိုလည်း ဘတ် ၁၀,၀၀၀ ကနေ ဘတ် ၁၀၀,၀၀၀ အထိ ဒဏ်ငွေပေးဆောင်ရမှာ ဖြစ်ပြီး အလုပ်သမား ငှားရမ်းခွင့် ၃ နှစ် ပိတ်သိမ်း ခံရမယ်လို့လည်း ထိုင်းအလုပ်သမားစီမံခန့်ခွဲရေးဌာနက သတိပေး ထုတ်ပြန်ထားပါတယ်။
ထိုင်းနိုင်ငံသားတွေသာ လုပ်ခွင့်ရှိတဲ့ လုပ်ငန်းအမျိုးစားတွေကို နိုင်ငံခြားသား အလုပ်သမားတွေ ဝင်ရောက် လုပ်ကိုင်မှု မရှိဖို့ စစ်ဆေးတာတွေ အရှိန် တိုးမြှင့်မယ်လို့ ထိုင်းအလုပ်သမားဝန်ကြီးဌာန ရဲ့ ပြောရေးဆိုခွင့်ရှိသူက ပြောကြားထားပါတယ်။
