မြန်မာနိုင်ငံကူးလက်မှတ်ရုံးတွေမှာ တစ်လနီးပါးကြာတဲ့အထိ QR Code တင်ခွင့်မရသေးဘူးလို ဝန်ဆောင်မှုပေးနေသူတွေက ပြောပါတယ်။ မတ်လ၂၈ရက်က အင်အားပြင်း ငလျင်လှုပ်ခတ်မှုကြောင့် တာဝါတိုင်တွေ ပျက်ဆီးခဲ့တယ်ဆိုပြီး QR Code ထုတ်ပေးတာတွေ ရပ်တန့်နေတာ ဖြစ်ပါတယ်။
"ငလျင်လှုပ်ပြီး ၂ရက် လောက်က တင်လို ရသေးတယ် ။ နောက်ရက်တွေမှာ လုံးဝတင်မရတော့ဘူး ။ အခုအထိပဲ ။ ဘယ်တော့ ရမယ်လဲ မသိရဘူး။ ပြည်ပထွက်မှာ စိုးလို့ တမင် ပိတ်ထားသလားလို့ တွေးမိတယ်။ ပြန်တင်လိုရရင်တော့ စုပြုံပြီး တင်ကျမှာ။ ပတ်စပိုစာအုပ် တင်ဖို စောင့်နေသူတွေ များတယ်"လို့ နိုင်ငံကူးလက်မှတ် ဝန်ဆောင်မှုပေးနေသူ တစ်ဦးက ပြောပါတယ်။
နိုင်ငံကူးလက်မှတ်အတွက် ရက်ကို ကြိုတင် ရက်ချိန်းရယူရတဲ့ QR Code ကို အွန်လိုင်းကတစ်ဆင့် ပြုလုပ်ရတာဖြစ်ပါတယ်။ QR code မှာ နိုင်ငံကူးလက်မှတ်ရုံးမှာ လျှောက်ထားရမဲ့ ချိန်းဆိုတဲ့ နေ့ရက်ပါဝင်ပြီး အဲ့ဒီရက်မှာ လျှောက်ထားသူက သက်ဆိုင်ရာ ရုံးကို သွားရောက်မှာ ဖြစ်ပါတယ်။
လက်ရှိ နိုင်ငံကူးလက်မှတ် ပြုလုပ်ခွင့် QR code ရက်ချိန်း ယူမရပေမယ့် ကျန်းမာရေး၊ပညာရေးစတဲ့ အရေးပေါ် ကိစ္စရှိသူတွေ အတွက် Green Channel အစီစဉ်နဲ့ ဆောင်ရွက်ပေးနေတယ်လို စစ်ကောင်စီရဲ့ သတင်းထုတ်ပြန်ရေးအဖွဲက မီဒီယာတချို့ကို ဖြေကြားထားပါတယ်။
မြန်မာနိုင်ငံကူးလက်မှတ်ရုံးတွေမှာ ကြိုတင်ရက်ချိန်းကို ဇွန်လ အထိ ပေးထားပြိး ဖြစ်တယ်လို သိရပါတယ်။
