မြန်မာနိုင်ငံကူးလက်မှတ်ဆိုင်ရာဥပဒေကို လက်ရှိအခြေအနေနဲ့ လိုက်လျောညီထွေဖို့ဆိုကာ အသစ်ပြင်ဆင်ပြဋ္ဌာန်းဖို့ စစ်ကော်မရှင်ဘက်က စီစဉ်ပြုလုပ်နေတယ် လို့ သိရပါတယ်။
လက်ရှိအသုံးပြုနေတဲ့ ၁၉၂၀ ပြည့်နှစ်၊ အိန္ဒိယအက်ဥပဒေ အမှတ် ၃၄ ဖြင့် ပြဋ္ဌာန်းခဲ့တဲ့ မြန်မာနိုင်ငံကူး လက်မှတ်အက်ဥပဒေဟာ လက်ရှိအခြေအနေနှင့်လိုက်လျောညီထွေမှုမရှိ တဲ့ အတွက် ပြန်လည် ပြဌာန်းတာလို့ ဆိုပါတယ်။
ပြီးခဲ့တဲ့ ဖေဖေါ်ဝါရီ ၁၁ရက်က မြန်မာနိုင်ငံကူးလက်မှတ်ဆိုင်ရာ ဥပဒေ(မူကြမ်း)ရေးဆွဲရေး ဆိုင်ရာ အပြီးသတ်ညှိနှိုင်း အစည်းအဝေး ကို စစ်ကော်မရှင်လက်အောက်ရှိ ဥပဒေရေးရာဝန်ကြီးဌာန ပြည်ထောင်စုရှေ့နေချုပ် ဒေါက်တာသီတာဦး က ဦးဆောင် ကျင်းပ ခဲ့တယ်လို့ သိရပါတယ်။
လက်ရှိ တွင် နိုင်ငံကူးလက်မှတ် အတုအပပြုလုပ်ခြင်း၊ အခြားသူတွေရဲ့ နိုင်ငံကူးလက်မှတ်ကို ကိုင်ဆောင်အသုံးပြုခြင်း၊ မိမိနိုင်ငံကူးလက်မှတ်ကဲ့သို့ ပြင်ဆင်ပြောင်းလဲ၍ အသုံးပြုခြင်း၊ မိမိနိုင်ငံကူးလက်မှတ်ကို အခြားသူအား အသုံးပြုစေခြင်း စတဲ့ မဟုတ်မမှန် လိမ်လည်ဆောင်ရွက်မှုတွေ ကို အရေးယူဆောင်ရွက်ရာတွင် အခက်အခဲများ၊ လိုအပ်ချက်များကို ဖြေရှင်းဆောင်ရွက်နိုင်ဖို့ ပြောင်းလဲလာတဲ့ အခြေအနေတွေနဲ့ လိုက်လျောညီထွေဖြစ်စေရန် ဥပဒေအသစ်ရေးဆွဲရခြင်းဖြစ်တယ်လို့ ပြည်ထောင်စုရှေ့နေချုပ် ဒေါက်တာသီတာဦးက ပြောပါတယ်။
"တကယ်ပြင်ချင်ရင် ဝန်ထမ်းတွေရဲ့ အကျင့်ပျက်ခြစား တာကို ပြင်ရမှာအခုသူတို့ ဥပဒေ ပြဌာန်းမယ်ဆိုတာ နိုင်ငံကူးလက်မှတ် အတု လုပ်လို့ ဆိုတာထက် ပြည်သူကို အခုထက်ပိုမို တင်းကျပ်ကန့်သက်ဖို့ လုပ်တယ်လို့ဘဲ မြင်တယ်""လို့ ပြည်သူတစ်ဦးက ပြောပါတယ်။
လက်တလောမှာလည်း ပြည်တွင်းမှ လူငယ်တွေ ကို ပြည်ပမထွက်နိုင်အောင် စစ်ကော်မရှင် ဘက်မှ အမျိုးမျိုး ကန့်သက် တင်းကျပ်တာတွေ ပြုလုပ် နေတဲ့ အတွက် ပြည်သူ တွေမှာ အခက်ခဲ နစ်နာဆုံးရှုံးတာတွေ ဖြစ်ပေါ်လျက်ရှိပါတယ်။
