ထိုင်းနိုင်ငံ၊ ချွန်ပူလီခရိုင်၊ ချွန်ပူလီမြို့ရှိ (မီးကြိုး) စက်ရုံ မှာ အလုပ် လုပ်နေတဲ့ မြန်မာ အလုပ်သမား ၁၀၀ ကျော် မှာ နားရက်မရှိ အလုပ်ဆင်းရပေမယ့် အချိန်ပိုကြေးမရတာကြောင့် အလုပ်သမားရုံး(ဆဝါဒီကန်ရုံး) ကို တိုင်ကြားထားတယ်လို့ ၎င်းအလုပ်သမားတွေကို ကူညီဆောင်ရွက်ပေးနေတဲ့WAG - အလုပ်သမားမဟာမိတ်အဖွဲ့ထံ မှ သိရပါတယ်။ 

၎င်းစက်ရုံ ရှိ မြန်မာအလုပ်သမား ၁၀၀ ကျော်မှာ MOU၊ PJစာအုပ်နဲ့ CI စာအုပ် ကိုင်ဆိုင်ထားသူတွေ ဖြစ်ကာ စက်ရုံ မှာ အလုပ် လုပ်သက် ၃နှစ် မှ ၄နှစ် အထိ ရှိပြီ ဖြစ်တယ်လို့ သိရပါတယ်။ 

စက်ရုံ မှာ  အလုပ်စဆင်း တဲ့ အချိန်က တော့ သူဌေးဖြစ်သူ  မှ  တစ်ပတ်လျှင် နားရက်တစ်ရက်ရှိတယ်လို့ ပြောခဲ့ပေမယ့်  တနင်္ဂနွေ ရုံးပိတ်ရက် မပိတ်တဲ့ အပြင် အချိန်ပိုဆင်းခိုင်းပြီး အချိန်ပိုကြေးမပေးကြောင်းအစိုးရရုံးပိတ်ရက် တွေလည်း မပိတ်ဘဲ အလုပ်ဆင်းရကာ  အလုပ်စဝင်ကတည်းက နားရက်များမရှိဘဲ နေ့ရက်ဆက်တိုက်ဆင်းရတယ်လို့ အလုပ်သမားတွေက ပြောကြားပါတယ်။ 

ဒါ့အပြင် အလုပ်သမားတွေ မှ   နေမကောင်းသဖြင့်အလုပ်နားရက်ယူရန်  ခွင့်တိုင်ဖို့ပျက်ကွက်ပါက ဒဏ်ငွေ ဘတ် ၃၀၀ဆောင်ရတယ်လို့ ဆိုပါတယ်။ 

အခုလို အလုပ်သမား အခွင့်ရေး ချိုးဖောက်ခံနေရတဲ့ အတွက် မြန်မာအလုပ်သမားတွေ က WAG - အလုပ်သမားမဟာမိတ်အဖွဲ့ထံအကူညီတောင်းခံ ပြီး နယ်မြေခံအလုပ်သမားရုံး(ဆဝါဒီကန်ရုံး)မှာ အလုပ်ရှင် သူဌေး ကို ဖေဖေါ်ဝါရီ ၃ရက်နေ့ တိုင်ကြားထားတယ်လို့ သိရပါတယ်။