စားဝတ်နေရေး ကျပ်တည်းမှုကြောင့် ခေတ်နဲ့ လျော်ညီတဲ့ လုပ်ခလစာတိုးပေးဖို့ ၊ လုပ်ငန်းခွင်ဆိုင်ရာအခွင့်အရေးချိုးဖောက်ခံရမှုတွေကို ဖြေရှင်းပေးဖို့ Lita Myanmar Co.,ltd အလုပ်သမားတွေက မြန်မာနိုင်ငံကုန်ထုတ်နှင့်စက်မှုလက်လက်မှုလက်မှု အလုပ်သမားများအဖွဲ့ ချုပ် IWFM ကို အကူအညီတောင်းခံထားတာပါ။
တရုတ်နိုင်ငံသားပိုင်ဖြစ်တဲ့ အဆိုပါလုပ်ငန်းမှာ အလုပ်သမား ၈၀၀ ကျော်နဲ့ လည်ပတ်နေပြီး Srrvo, Cross Linen, Onward စတဲ့အမှတ်တံဆိပ်တွေချုပ်လုပ်နေလို့ သိရပါတယ်။
စက်ရုံက ရန်ကုန်တိုင်း၊ ရွှေပြည်သာမြို့နယ်၊ သာဓုကန်စက်မှုဇုန် ၄ ၊ စက်ဆရာဦးထွန်းလမ်း မှာ ဖွင့်လှစ်ထားတာဖြစ်ပါတယ်။
လုပ်ငန်းခွင်ထဲမှာ အလုပ်သမားတွေခံစားခွင့်ရှိတဲ့ ရှောင်တခင်ခွင့် ၊ ဆေးခွင့်တွေခံစားခွင့်မရဘဲ အလုပ်တရက်ပျက်ပါက ဒေးကြေး၊ ထောက်ပံ့ကြေး၊ ရက်မှန်ကြေး စုစုပေါင်း ၄၈၀၀၀ ကျော်ဖြတ်တောက်ခံရတာကြောင့် နစ်နာမှုရှိနေတယ်လို့ အလုပ်သမားကပြောပါတယ်။
အလုပ်သမားတွေချုပ်လုပ်နိုင်တာထက်ပိုတဲ့ အထည်စံချိန်တောင်းခံတာတွေရှိနေတယ်လို့ လည်း အလုပ်သမားတွေကပြော ထားပါတယ်။ လူဦးရေ ၄၀ ရှိတဲ့ စက်လိုင်းတလိုင်းမှာ အထည် ၄၀ နှုန်းနဲ့ ချုပ်လုပ်ပေးနေရတယ်လို့ ပြောပါတယ်။
" အချိန်ပိုအိုတီကိုနေ့တိုင်း ည၈နာရီခွဲ အထိလောက်ဆင်းရပြီး စနေနေ့ဆိုရင် ၆နာရီအထိဆင်းနေရပါတယ်။ အလုပ်ရှင်ဘက်တော့ လစာ ပိုလိုချင်ရင် အချိန်ပိုအိုခေါ်ရင် ဆင်းကြပါဆိုပြီးပြောပါတယ်၊ တစ်နေ့အလုပ်ချိန် ၁၂နာရီလောက်လုပ်ရပေမယ့် ငါးသိန်းခွဲလောက်တောင်မရပါဘူး စားဝတ်နေရေး မပြေလည်တဲ့အတွက် ဒေးကြေးတိုးပေးစေချင်တယ်"လို့ အလုပ်သမားကပြောပါတယ်။
အလုပ်သမားတွေအနေနဲ့ ကောင်းမွန် တဲ့ လုပ်ငန်းခွင်ဖြစ်ရေးအတွက် အောက်ပါအချက်တွေဖြေရှင်းပေးဖို့ တောင်းဆိုထားပါတယ်။
အလုပ်သမားများတောင်းဆိုချက်တွေကတော့
၁။ အလုပ်ရှင်ဘက်က အလုပ်သမားများမချုပ်လုပ်နိုင်သော အထည်စံချိန်တောင်းခံနေခြင်းမပြုလုပ်ရန်။
၂။ အလုပ်သမားများခံစားခွင့်ရှိသော ရှောင်တခင်ခွင့်၊ ဆေးခွင့်ကို အလုပ်ရှင်ဘက်မှခံစားခွင့်ပေးရန်။
၃။ အိမ်သာတွေ ပြည့်လျှံနေခြင်းကို အလုပ်ရှင်မှစီစဥ်ဆောင်ရွက်ပေးရန်။
၄။ အလုပ်ရှင်ဘက်မှ စနေနေ့များတွင် ညနေ၆နာရီမထိ အချိန်ပိုအိုတီဆင်းခိုင်းခြင်းမပြုလုပ်ရန်။
၅။ အလုပ်ရှင်ဘက်မှ နေ့စားအလုပ်သမားများအဖြင့် အသက်၁၅၊ ၁၆အရွယ်ရှိသော လူငယ်၊ လူရွယ် အလုပ်သမားများကို လူကြီးအလုပ်သမားများနှင့် တန်းတူခိုင်းစေနေခြင်းမပြုလုပ်ရန်။
၆။ အလုပ်ရှင်ဘက်မှ အလုပ်သမားများကို ဒေးကြေးတိုးပေးရန်။
၇။ စက်ရုံတစ်မိုးအောက့်ထဲတွင် အတူတူလုပ်လုပ်နေရသော သန့်ရှင်းရေးအလုပ်သမားများကိုလည်း ဒေး ကြေးအတူတူပေးရန် Lita Myanmar Co.,ltd အလုပ်သမားတွေကတောင်းဆိုထားတာဖြစ်ပါတယ်။
