စစ်ကောင်စီ လက်အောက်ခံတရားရုံးက ထောင်ဒဏ်၂ နှစ်နှင့် ငွေဒဏ် ကျပ်နှစ်သောင်းချမှတ်ခြင်းခံထားရတဲ့ မြန်မာနိုင်ငံ စက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS-TUsF) မှ အထွေထွေအတွင်းရေးမှူးချုပ် ဖြစ်သူ ကိုသက်နှင်းအောင်ဟာ ထောင်တွင်းဆေးကုသမှုခံယူခဲ့ရတယ်လို့ သိရပါတယ်။
“ကိုသက်နှင်းအောင်က ပုဒ်မ၁၇( ၁)နဲ့ အမိန့်ချခံထားရတာပါ။ သထုံစျေးမသွယ်ထောင်မှာပါ။ ထောင်ဒဏ်နှစ်နှစ်ချမှတ်ခံထားရတယ်။ ၂၀၂၁ခုနှစ် သြဂုတ် ၂၃ရက်နေ့ကနေစပြီး ချုပ်ရက်ရတယ်။လက်ရှိကျန်းမာရေးကတော့ ပြန်ကောင်းမွန်လာပါပြီ။ ပြီးခဲ့တဲ့လကတော့ ထောင်ဆေးရုံ၃ရက်တက်ခဲ့ရတယ်။ အစာအိမ်ရောင်ရောဂါပါ”လို့ MICS- TUsFမှ တာဝန်ရှိသူတစ်ဦးဖြစ်သူ ကိုနေလင်းအောင်ကဆိုပါတယ်။
မြန်မာနိုင်ငံ စက်မှုလက်မှုနှင့် ဝန်ဆောင်မှု လုပ်ငန်းပေါင်းစုံ အလုပ်သမားသမဂ္ဂအဖွဲ့ချုပ်မှ အလုပ်သမားခေါင်းဆောင် ဦးသက်နှင်းအောင်ဟာ ပုဒ်မ ၁၇/၁ ဖြင့် အကျဉ်းချခံထားရသည်မှာရက်ပေါင်း ၆၁၅ ရက်၊ နှစ်နှစ်နီးပါးရှိပြီဖြစ်ပြီး ၎င်းကို ဒီဇင်ဘာလ ၅ရက်နေ့က ပေါင်မြို့နယ်တရားရုံးမှ မတရားအသင်း ဆက်သွယ်မှု (၁၇/၁)ဖြင့် ထောင်ဒဏ်၂ နှစ်နှင့် ငွေဒဏ် ကျပ်နှစ်သောင်းချမှတ်ခဲ့တာပဲဖြစ်ပါတယ်။
စစ်အာဏာသိမ်းပြီးနောက်ပိုင်း အလုပ်သမားများအရေးကူညီဆောင်ရွက်ပေးတဲ့ MICS-TUsF အဖွဲ့ချုပ်ရဲ့ ရုံးခန်းများကို စစ်ကောင်စီးကဝင်ရောက်စီးနင်းမှုတွေပြုလုပ်ခဲ့တာကြောင့်တိမ်းရှောင်စဉ် မြဝတီမြို့မှာစစ်ကောင်စီရဲ့ဖမ်းဆီးမှုခံခဲ့ရပြီး ရန်ကုန်အင်းစိန်ထောင်မှတစ်ဆင့် သထုံမြို့နယ် စျေးမသွယ်ထောင်သို့ လွှဲပြောင်းကာ ပေါင်မြို့နယ်တရားရုံးက အမိန့်ချမှတ်ခဲ့တာပဲဖြစ်ပါတယ်။
#MyanmarLabourNews
Photo- ကိုသက်နှင်းအောင်
