ထိုင်းနိုင်ငံမှာရှိတဲ့ မြန်မာအပါအဝင် ရွှေ့ပြောင်း လုပ်သားတွေ ရဲ့ ကလေးငယ်တွေကို ထိုင်းအစိုးရအနေနဲ့ စနစ်တကျ စောင့်ရှောက်မှု မရှိပါကလေးငယ် ၇၈,၈၆၄ ဦးခန့်ဟာ အလုပ်ခွင်ကို စောစီးစွာ ဝင်ရောက်နိုင်တဲ့ အန္တရာယ် နဲ့ ရင်ဆိုင်နေရတယ်လို့ ရွှေ့ပြောင်းအလုပ်သမားဆိုင်ရာ အဖွဲ့အစည်းများကွန်ရက် (Migrant Working Group - MWG) က ဖေဖေါ်ဝါရီ ၁၈ရက်မှာ ထုတ်ပြန်ပါတယ်။
ထိုင်းနိုင်ငံရှိ လုပ်ငန်းခွင်အသီးသီးမှာ မြန်မာအပါအဝင် ရွှေ့ပြောင်း လုပ်သား ၅သန်းခန့်ရှိနေပြီး ၎င်းရွှေ့ပြောင်းလုပ်သားတွေရဲ့ မိသားစု တွေ ထဲ ကလေးငယ်အများပြား ပါဝင် ပြီး ၂၀၂၅ခုနှစ် အတွက် ခန့်မှန်းခြေ စာရင်းအချက်အလက် အရ ၇၈၈၆၄ဦးခန့်ရှိတယ်လို့ ထုတ်ပြန်ချက်မှာဖေါ်ပြထားပါတယ်။
ထိုကလေးငယ်တွေဟာ ထိုင်းအလုပ်သမား စနစ်ရဲ့ တည်ငြိမ်မှုနဲ့ တိုက်ရိုက်ဆက်စပ်နေပြီး စနစ်တကျ စောင့်ရှောက်မှု မရှိပါက ၎င်းတို့ဟာ အလုပ်ခွင်ကို စောစီးဝင်ရောက်ခြင်းသို့မဟုတ် ထိခိုက်လွယ်တဲ့ အခြေအနေနဲ့ ရင်ဆိုင်ရမှာ ဖြစ်ကာ နိုင်ငံရဲ့ ထုတ်ကုန်ပုံရိပ် နဲ့ ကုန်သွယ်မှုကို ထိခိုက်စေနိုင်တယ်လို့ MWGကသတိပေးထားပါတယ်။
ထိုင်းအစိုးရအနေနဲ့ ရွှေ့ပြောင်းကလေးတွေ အခြေခံပညာ သင်ကြားခွင့်စနစ်တကျမြှင့်တင်ပေးဖို့ ပြောထားပြီး ရွှေ့ပြောင်းကလေးတွေကို အကာကွယ်ပေးတာဟာ ဝန်ထုပ်ဝန်ပိုးမဟုတ်ဘဲ လုပ်သားဈေးကွက်တည်ငြိမ်ရေးနဲ့စီးပွားရေးအတွက် ရင်းနှီးမြှုပ်နှံမှုဖြစ်တယ်လို့ ဆိုထားပါတယ်။
ဒါ့အပြင် ကလေးသူငယ် ပညာရေးနဲ့ ကာကွယ်စောင့်ရှောက်ရေးစီမံခန့်ခွဲရေး အတွက် ထိရောက်မှု၊ပွင့်လင်းမြင်သာ မှု ရှိ ဖို့ အတွက် ထိုင်းနိုင်ငံဥပဒေနဲ့အညီ ဆောင်ရွက်ရန် အသိပေးထားသလို နိုင်ငံတကာအသိုက်အဝန်းတွင် ယုံကြည်မှုကို မြှင့်တင် ဖို့ အတွက် ကဏ္ဍပေါင်းစုံတွင် ကလေးလုပ်သားပပျောက်ရေး ကို ထိုင်းနိုင်ငံရဲ့ ကတိကဝတ် အတိုင်း အတည်ပြုပြသရန်ကို လည်း MWG အဖွဲ့ရဲ့ ထုတ်ပြန်ချက်မှာဖေါ်ပြထားပါတယ်။
