ထိုင်းနိုင်ငံမှာ အကြောင်းအမျိုးမျိုးနဲ့ ရောက်ရှိနေထိုင်နေကျတဲ့ မြန်မာနိုင်ငံသားတွေ အနေနဲ့ အိမ်ရှင် ထိုင်းနိုင်ငံသားများရဲ့ လူမှုအသိုင်းအဝိုင်းရဲ့ လူနေမှု ပုံစံနဲ့ အညီ သဟဇာတ ဖြစ်အောင် နေထိုင်ကြဖို့ အမျိုးသားညီညွတ်ရေးအစိုးရNUGက ဒီနေ့မှာ အသိပေးချက်ထုတ်ပြန်လာပါတယ်။

 

ယခုရက်ပိုင်းမှာ ထိုင်းနိုင်ငံရောက် မြန်မာနိုင်ငံသား အချို့ အိမ်ရှင်နိုင်ငံသားတွေနဲ့ ရန်ဖြစ်ခြင်းတွေ မြန်မာနိုင်ငံသားအချင်းချင်း အုပ်စုဖွဲ့ ရန်ဖြစ်ခြင်းစတာတွေ ဖြစ်ပေါ်လာတဲ့ အပေါ် NUGမှ အခုလို အသိပေး ပန်ကြားချက် ထုတ်ပြန်လာတာဖြစ်ပါတယ်။

 

အသိပေးပန်ကြားချက်တွင် မြန်မာနိုင်ငံ မှာ အကြမ်းဖက်စစ်အုပ်စုရဲ့ အကြမ်းဖက်နှိပ်စက်မှုကြောင့် လည်းကောင်း၊စီးပွားရေးဆိုင်ရာ အခွင့်အလမ်းများ ရှားပါး လာမှုတို့ကြောင့် လည်းကောင်း မြန်မာနိုင်ငံသားများစွာဟာ အမိမြေ ကို မလွဲမရှောင် စွာနဲ့ စွန့်ခွာပြီး အိမ်နီးချင်း ထိုင်းနိုင်ငံမှာ ခေတ္တခဏ ခိုလှုံနေထိုင် လျက်ရှိပါတယ်။

 

အခုလို ခိုလှုံစဉ်အတွင်းမှာ ထိုင်းနိုင်ငံကပြဌာန်းထားတဲ့ဥပဒေတွေ စည်းမျဉ်းစည်းကမ်းတွေ၊ယဉ်ကျေးမှုဓလေ့ထုံးတမ်းတွေနဲ့ ဒေသန္တရစည်းကမ်းတွေကို လေးစား လိုက်နာကြဖို့ လိုသလို ထိုင်းနိုင်ငံရဲ့ နိုင်ငံရေးနဲ့ အုပ်ချုပ်မှုရေးရာ ကိစ္စရပ်တွေမှာပါဝင်ပတ်သတ်တာတွေမလုပ်ကြဖို့နဲ့ တရားဥပဒေနဲ့ မညီတဲ့ကိစ္စရပ်တွေမှာ မပါဝင်ကြဖို့လည်း NUGက သတိပေးထားပါတယ်။

 

အကြောင်းအမျိုးမျိုးနဲ့ နိုင်ငံစွန့်ခွာ ထွက်ပြေးကာ ခိုလှုံနေထိုင်နေကြတဲ့ မြန်မာနိုင်ငံသားတွေကို ကာကွယ်စောင့်ရှောက် လက်ခံပေးထားတဲ့ ထိုင်းဘုရင်မင်းမြတ်၊ထိုင်းအစိုးရနဲ့ ထိုင်းပြည်သူလူထုကိုလည်း အထူးကျေးဇူးတင်ရှိပါကြောင်း နဲ့ မြန်မာနိုင်ငံသား တွေကို လည်း လူသားချင်းစာနာထောက်ထား လျက် ဆက်လက် ကူညီစောင့်ရှောက်ပေးရန်လည်း မေတ္တာရပ်ခံထားပါတယ်။

 

မြန်မာနိုင်ငံ တွင် စစ်အာဏာသိမ်းပြီး နောက်ပိုင်း ထိုင်းနိုင်ငံ သို့ အကြောင်းအမျိုးမျိုးနဲ့ ရောက်ရှိနေတဲ့ မြန်မာနိုင်ငံသား ၆သန်းဝန်းကျင်အထိ ရှိလာကြောင်း မြန်မာအလုပ်သမားအရေးဆောင်ရွက်နေသူတွေထံမှသိရပါတယ်။