ထိုင်းနိုင်ငံရောက် မြန်မာအလုပ်သမားတွေအနေနဲ့ စစ်ကောင်စီဘက်က စစ်မှုထမ်းဆင့်ခေါ်လာပါက အလုပ်ထွက်ပြီး မြန်မာပြည် ပြန်ရမယ် ဆိုတဲ့ အလုပ်ရှင်အလုပ်သမားသဘောတူညီချက်စာချုပ်ကို ထိုင်းအလုပ်ရှင်တွေက အလုပ်သမားကို လက်မှတ်ထိုးခိုင်းတာတွေ စတင်ပြုလုပ်နေတယ်လို့ ထိုင်းရောက်မြန်မာအလုပ်သမားတွေထံက သိရ ပါတယ်။
အဆိုပါကတိကဝတ်စာချုပ်ကို စစ်ကောင်စီရဲ့မြန်မာသံရုံးက လက်မှတ်ထိုးခိုင်းချက်အရ စက်ရုံအလုပ်ရုံအလုပ် ရှင်တွေကပါ အလုပ်သမားတွေကိုလက်မှတ်ထိုးခိုင်းနေတာ ဖြစ်တယ်လို့ မြန်မာအလုပ်သမားများက စာချုပ်နဲ့ တကွ ထုတ်ဖော်ပြောဆိုလာတာ ဖြစ်ပါတယ်။
"ဟုတ်ပါတယ်။ သူကစစ်ကောင်စီရဲ့ သံရုံးကဒါကိုလုပ်ဖို့ပြောလာလို့ ထိုင်းစက်ရုံအလုပ်ရုံတွေကအလုပ်ရှင် တွေက လုပ်လာတာ။ စစ်မှုထမ်းက ထိုင်းနိုင်ငံအထဲထိကိုလိုက်ပြီးပါလာတာတဲ့သဘောပဲ။ ထိုင်းကလည်းလက်ခံထားတာဆိုတော့ ဘာတွေရှိနေမလဲ။ ခုကစာချုပ်တွေပါထွက်လာတယ်။ အလုပ်သမား တွေလည်းနေစရာမရှိ ကျီးလန့်စာစားဖြစ်နေရပြီ။ G to G အဆင့်လုပ်တယ်လို့တော့သိရတယ်" လို့ ထိုင်းရောက် မြန်မာအလုပ်သမားအရေးကူညီဆောင်ရွက်ပေးသူတစ်ဦးက ဆိုပါတယ်။
အဆိုပါစာချုပ်ပါစည်းကမ်းချက် တွေ အရ ဝန်ထမ်းကိုစစ်မှု ထမ်းရန်ခေါ်ယူတဲ့ ကိစ္စမှာ "ဝန်ထမ်းသည်ကုမ္ပဏီ၏ ဝန်ထမ်းဖြစ်ခြင်းမှရပ်စဲပြီး ချက်ခြင်းနှုတ်ထွက်ရမည်။ ကုမ္ပဏီသည် အောက်ပါကိစ္စရပ်များအတွက် အလုပ်မှရပ်စဲ ခွင့်ရှိသည်ဆိုကာ အကျင့်ပျက်ခြစားခြင်းသို့မဟုတ်ကုမ္ပဏီကို ရာဇဝတ်မှုကျူးလွန်ရန် တမင်ကျူးလွန်ခြင်း၊ ကုမ္ပ ဏီကို တမင်ထိခိုက်စေသည်"ဟုဆိုကာထည့်သွင်းချုပ်ဆိုထားတာဖြစ်တယ်လို့ စာချုပ်ပါအရ သိရပါတယ်။
ပြီးခဲ့တဲ့ ဖေဖော်ဝါရီလ ၁၉ ရက်က ထိုင်းနိုင်ငံ၊ စမူပကန်ခရိုင်ရှိ OCTA Food စက်ရုံမှာ အလုပ်လုပ် နေတဲ့ မြန်မာအလုပ်သမားတချို့ကို စစ်မှုထမ်းဖို့အလှည့်ကျဆင့်ခေါ်ထားပြီး စက်ရုံထဲမှာစစ်မှု ထမ်းဖို့ ဘန်ကောက်ရှိ စစ်ကောင်စီ မြန်မာသံရုံးက အလှည့်ကျစာရင်းပေးပို့လာလို့ စစ်မှုထမ်းရမဲ့အလုပ်သမားတွေပါရှိ နေတယ်ဆိုကာ အလုပ်မှရပ်စဲလိုက်သလို အခြားသောအလုပ်သမားတွေအနေနဲ့လည်း စစ်မှုထမ်းစာရင်းပါရှိပါက စစ်မှုထမ်းပြန်ဖို့ယခုလိုစာချုပ်မှာ လက်မှတ်ရေးထိုးခိုင်းလာတာ ဖြစ်တယ်လို့ သိရပါတယ်။
"မြန်မာသံရုံးက စစ်မှုထမ်းရမယ့် အလုပ်သမားစာရင်းက သူတို့သံရုံးကိုအရင်ရောက်နိုင်တယ်။ သံရုံးကနေမှ အလုပ်သမားစီရောက်မယ်။ ဒီလိုပုံစံအတိုင်းဆိုရင် MoUတွေလျော့နည်းလာတော့မယ်လို့မြင်တယ်။ MoUတွေက အေဂျင်စီနဲ့စာချုပ်ချုပ်ရင်လည်း အဲ့ဒီစစ်မူထမ်းစာချုပ်ပါအချက်ထည့်ချုပ်ရတယ်ဆိုတော့ စာရင်းအတိအကျနဲ့လာဖို့က MoU တွေပဲရှိတယ်။ ရှေ့ဆက်အခြေအနေတွေ ပိုဆိုးလာဖို့ပဲရှိတယ်။ ထိုင်းရောက်မြန်မာအလုပ်သမားတွေက နှိမ်ခံဖိနှိပ်ခံရတာ ခုလိုဆိုပိုပြီးဆိုးလာတော့မယ်" လို့ ထိုင်းရောက်မြန်မာအလုပ်သမားတစ်ဦးကဆိုပါတယ်။
အာဏာသိမ်းစစ်ကောင်စီက ပြည်ပထွက်ခွာလုပ်ကိုင်မဲ့ ပြည်တွင်းအလုပ်သမားတွေကို နည်းလမ်းမျိုးစုံနဲ့ ကန့်သတ်မှုတွေပိတ်ဆို့မှုတွေ တားဆီးမှုတွေပြုလုပ်နေတဲ့အပြင် MoU စာချုပ်မှာစစ်မူထမ်းဆင့်ခေါ်ပါက မဖြစ်မနေပြန်လည်ဝင်ရောက်ထမ်းဆောင်ဖို့ ထည့်သွင်းချုပ်ဆိုရသလို ထိုင်းနိုင်ငံအတွင်းရှိ မြန်မာအလုပ်သမား တွေကိုပါ စစ်မှုထမ်းဆောင်ရွက်ဖို့ ပြည်တော်ပြန်ရေးကိုပါ ထိုင်းအစိုးရနဲ့ပူးပေါင်းကာ နည်းလမ်းအမျိုးမျိုးဖြင့် ဖိအားပေး ခြိမ်းခြောက်မှုတွေ လုပ်ဆောင်လာတာဖြစ်ပါတယ်။
