ထိုင်းနိုင်ငံ ချွန်ဘူရီပြည်နယ် ရှိ ဆောက်လုပ်ရေး လုပ်ငန်းခွင် နှစ်ခု ကို ထိုင်းအာဏာပိုင်များ က ဝင်ရောက် စစ်ဆေးရာ အထောက်အထားမရှိတဲ့ မြန်မာရွှေ့ပြောင်းလုပ်သား ၃၀ကျော် အဖမ်းခံရတယ်လို့ ထိုင်းသတင်းတွေအရ သိရပါတယ်။

မတ်လ ၁၁ ရက်က ချွန်ဘူရီပြည်နယ် ဒွန်ဟွာလောဒေသနဲ့ ဘန်ဘန်းဒေသရှိ စက်ရုံဆောက်လုပ်ရေးလုပ်ငန်းခွင်နှစ်ခုကို ထိုင်းရဲတပ်ဖွဲ့အပါအဝင် ဌာနဆိုင်ရာပေါင်းစုံက ရှောင်တင်ခင် ဝင်ရောက်စစ်ဆေးခဲ့ရာမှ တရုတ်နဲ့ မြန်မာ လုပ်သား တွေ အဖမ်းခံရတယ်လို့ သိရပါတယ်။

 

ဒွန်ဟွာလောမြို့နယ်က ဆောက်လုပ်ရေး လုပ်ငန်းခွင်ကို ဝင်ရောက်စစ်ဆေးရာမှာ တရုတ်နိုင်ငံသား ၂၉ဦး အလုပ်လုပ်နေတာ တွေ့ရပြီး ၂ဦးမှာ အထောက်အထား စာရွက်စာတမ်းမရှိတာ စစ်ဆေးတွေ့ရှိရတယ်လို့ သိရပါတယ်။

 

ဒုတိယ နေရာဖြစ်တဲ့ ဘန်ဘန်းမြို့နယ် က ဆောက်လုပ်ရေးလုပ်ငန်းခွင်ကို ဝင်ရောက်စစ်ဆေးရာမှာ နိုင်ငံခြားသား လုပ်သား ၁၀၀ကျော် လုပ်ကိုင်နေပြီး အာဏာပိုင်များ လာရောက်စစ်ဆေးတာ ကို မြင်တွေ့တဲ့အခါမှာ အချို့ အလုပ်သမားတွေက ထွက်ပြေးဖို့ ကြိုးစားခဲ့ပေမယ့် နောက်ဆုံး မှာ ဖမ်းမိခဲ့တယ်လို့ ဆိုပါတယ်။

 

၎င်းဆောက်လုပ်ရေး လုပ်ငန်းခွင်အတွင်း စစ်ဆေးတဲ့အခါမှာ အထောက်အထားမရှိဘဲ အလုပ်လုပ်ကိုင်နေတဲ့ မြန်မာနိုင်ငံသား အမျိုးသား၁၇ဦးနဲ့အမျိုးသမီး ၁၄ဦး စုစုပေါင်း၃၁ဦးနဲ့ တရုတ် အမျိုးသား ၄ဦး တို့ကို ဖမ်းဆီးခဲ့တယ်လို့ သတင်းမှာဖေါ်ပြထားပါတယ်။

 

လက်ရှိမှာ အထောက်အထားမရှိ လို့ အဖမ်းခံရတဲ့ လုပ်သားတွေ အပြင် ၎င်းတို့ကို လက်ခံကာ အလုပ်လုပ်ခွင့်ပေးတဲ့ လုပ်ငန်းရှင် ၂ဦးကိုလည်း စစ်ဆေးအရေးယူသွားမယ်လို့ သိရပါတယ်။

 

Ref-FM91