ထိုင်းနိုင်ငံ အတွင်း သို့ တရားမဝင် ဝင်ရောက်လာတဲ့ မြန်မာအလုပ်သမား ၁၆၉ ဦး ထပ်မံ အဖမ်းခံရတယ်လို့ ထိုင်းဒေသတွင်းသတင်းတွေရဲ့ဖေါ်ပြချက်အရသိရပါတယ်။

ဇန်နဝါရီ ၃၁ ရက် နံနက် ၆နာရီခန့်မှာ တရားမဝင်မြန်မာအလုပ်သမား ၁၆၉ ဦးတင်လာတဲ့ နောက်တွဲယာဉ်ပါ ကုန်တင်ကားကြီးတစ်စီး ကို ကန်ကျနဘူရီခရိုင် ဘောလွယ်မြို့နယ်ရှိ စစ်ဆေးဂိတ်ကို ဖြတ်မောင်းလာချိန်မှာ အဖမ်းခံခဲ့ရတာလို့ သိရပါတယ်။

ကုန်တင်ကားပေါ်မှ မြန်မာအလုပ်သမား အမျိုးသား၊အမျိုးသမီး ၁၆၉ဦး အပြင် ယာဉ်မောင်း ဖြစ်သူ ထိုင်းနိုင်ငံသား၂ဦးကိုပါ အဖမ်းခံရတာ ဖြစ်တယ်လို့ သိရပါတယ်။

""စစ်ဆေးရေးတွေ ဒီလောက် တင်းကြပ်နေတဲ့ အချိန် အောက်လမ်းကနေ မလာသင့်သေးဘူး အခုရက်ပိုင်း မြန်မာတွေ အတော်များများကို အဖမ်းခံနေရတာ ၊မြန်မာတွေပဲ ရွေးဖမ်းနေသလားတောင်ထင်ရတယ် ကိုယ့်နိုင်ငံ အတွင်းမှာလဲ စစ်မှုထမ်းကိစ္စတွေ မြေပြင် မအေးချမ်းတာတွေ နဲ့ နေမရ တာ သိပေမယ့် တရားမဝင် လာမယ်ဆိုလည်း သတင်းအချက်လက်တွေ သေချာ နားထောင်ပြီးမှ လာသင့်တယ် ပွဲစားတွေလည်း ကိုယ်ပိုက်ဆံရ ပြီးရောဆိုပြီး မပို့သင့်ဘူးခက်ခက်ခဲခဲ လာခဲ့ရပြီး ပိုက်ဆံလည်းကုန် လူလည်း အဖမ်းခံရ ရင် ဒုက္ခပေါ်ဒုက္ခ ဆင့်နေသလို ဖြစ်မှာ""လို့ ထိုင်းရောက်မြန်မာအလုပ်သမားတစ်ဦးကပြောပါတယ်။

ပြီးခဲ့တဲ့ ဇန်နဝါရီ ၂၉ ရက် မှာလဲ ထိုင်းနိုင်ငံ အတွင်း တရားမဝင် ဝင်ရောက် လာတဲ့ မြန်မာအလုပ်သမား ၂၀၀ နီးပါး ကို နေရာသုံးခုမှာ ဖမ်းဆီးခဲ့ပါသေးတယ်။

ဖမ်းဆီးခံရသူတွေကို ထိုင်းလဝကဥပဒေအရ အရေးယူဆောင်ရွက်ပြီးပါက နေရပ်ကို ပြန်ပို့မှာ ဖြစ်တယ်လို့ သိရပါတယ်။

၂၀၂၅ခုနှစ် နှစ်စပိုင်းမှစပြီး ကျားဖြန်နှိမ်နှင်းရေး အတွက် ဆိုကာ ထိုင်း-မြန်မာ နယ်စပ် တလျှောက် ထိုင်းနိုင်ငံဘက်မှ စစ်ဆေးမှု တွေ အထူးတင်းကြပ်လျက်ရှိ ပြီး စစ်ဆေးမှု ပြုလုပ်စဉ် အတွင်း တရားမဝင် ဝင်ရောက်လာတဲ့ မြန်မာအလုပ်သမား အဖမ်းခံရမှု ပိုများလာတယ်လို့ သိရပါတယ်။

ထိုင်းကို ဝင်ရောက်ရန်ကြိုးပမ်းတဲ့ မြန်မာတွေထဲမှာ ပြီးခဲ့တဲ့ ဇန်နဝါရီ ၂၉ ရက်တရက်တည်းမှာတင်ဖမ်းဆီးခံရတဲ့ သူ ၁၆၀ ကျော်ရှိခဲ့ပါတယ်။