ထိုင်းနိုင်ငံ အယုဒ္ဓယရှိ ဆောက်လုပ်ရေး လုပ်ငန်းခွင် တွင် အလုပ် လုပ်ကိုင်နေတဲ့ အထောက်အထားမရှိတဲ့ မြန်မာအလုပ်သမား ၃၇ဦး အဖမ်းခံရတယ်လို့ ထိုင်းသတင်းဌာနတွေ မှာဖေါ်ပြထားပါတယ်။

ဒီဇင်ဘာ ၈ရက် မနက်ပိုင်းမှာ ၎င်း ဆောက်လုပ်ရေး လုပ်ငန်းခွင်ကို ထိုင်းအာဏာပိုင်တွေ က ဝင်ရောက် စစ်ဆေးတာမှာ အဖမ်းခံရတာ ဖြစ်တယ်လို့ ဆိုပါတယ်။

အဖမ်းခံရတဲ့ အထောက်အထားမရှိသော မြန်မာအလုပ်သမားတွေ ဟာ ထိုင်းအာဏာပိုင်တွေ ဝင်ရောက်စစ်ဆေး ချိန်မှာ ထိတ်လန့်ကြောက်ရွံခဲ့ပြီး အိမ်ခေါင်မိုးပေါ် သို့ပင် တက်ပြေးခဲ့ကြတယ်လို့ ထိုင်းသတင်းမှာဖေါ်ပြထားပါတယ်။

၎င်းဆောက်လုပ်ရေး လုပ်ငန်းခွင် အတွင်းရှိ မြန်မာ အလုပ်သမား ၁၀၀ဦး ကို ထိုင်းအာဏာပိုင်တွေက စစ်ဆေးတာမှာ အထောက်အထားမရှိတဲ့မြန်မာအလုပ်သမား အမျိုးသား၂၆ဦးနဲ့ အမျိုးသမီး ၁၁ဦး

စုစုပေါင်း ၃၇ ဦး ကို ဖမ်းဆီးခဲ့တာလို့သိရပါတယ်။

ဖမ်းမိတဲ့ အလုပ်သမားတွေကို စစ်ဆေးတဲ့အခါ ထိုင်းနိုင်ငံမယ်ဟောင်ဆောင်ရှိ နယ်စပ်ကနေတစ်ဆင့် ထိုင်းနိုင်ငံထဲ ကို တရားမဝင် ဝင်ရောက်ခဲ့တာဖြစ်ပြီး ခရီးစရိတ် အတွက် ပွဲစား ကို တစ်ဦးလျှင် ဘတ် ၁၅၀၀၀ မှ ၂၀၀၀၀ ကြားပေးခဲ့ရကာ မြန်မာပြည်တွင်း ဖြစ်ပွားနေတဲ့ တိုက်ပွဲတွေကြောင့် အိမ်နီးချင်း နိုင်ငံ မှာ အလုပ်ရှာဖွေရတာ ဖြစ်တယ်လို့ ဖမ်းမိတဲ့ မြန်မာအလုပ်သမားတွေက ပြောကြားတယ်လို့ သတင်းမှာဖေါ်ပြထားပါတယ်။

ဆောက်လုပ်ရေး လုပ်ငန်းမှာတော့ တစ်ရက်ကို ဘတ် ၅၀၀ ခန့် လုပ်ခရရှိပြီး ကျွမ်းကျင် လုပ်သား တွေကတော့ ဘတ် ၆၀၀ ခန့်ရရှိတယ်လို့ ဆိုပါတယ်။

၎င်းမြန်မာအလုပ်သမား ၃၇ဦးကို နိုင်ငံအတွင်း တရားမဝင် ဝင်ရောက် နေထိုင်မှုဖြင့် အမှုဖွင့်အရေးယူထားကာ အောင်ဇိုင်းရဲစခန်း ကိုလွှဲပြောင်းထားတယ်လို့ သတင်းမှာဖေါ်ပြထားပါတယ်။