ကိုဗစ်ရောဂါမျိုးကွဲတခုဖြစ်တဲ့ အိုမီခရွန်ကူးစက်မြန်ရောဂါဖြစ်ပွားမှု့များပြားလာတာကြောင့်ထိုင်းနိုင်ငံမှနယ်စပ်ဂိတ်များကိုဆက်လက်ပိတ်ထားပြီးနိုင်ငံတွင်းပြည်ပလုပ်သားနဲ့ဧည့်သည်ဝင်ရောက်မှု့ဆက်လက်ပိတ်ပင်ထားတာကြောင့်မြန်မာ MOU လုပ်သားတွေအခက်ကြုံနေရတယ်လို့သိရပါတယ်။
ပထမဇန်နဝါရီလ ၁ ရက်နေ့ကနေ ၁၅ ရက်အတွင်းမြန်မာနယ်စပ်ဂိတ်တွေအပါအဝင်ကမ္ဘောဒီးယားနဲ့လာအိုနယ်စပ်ဂိတ်တွေပါပြန်ဖွင့်မယ်လို့ထိုင်းဝန်ကြီးချုပ်ပရာယွတ်ချန်အိုရဲ့အစိုးရအဖွဲ့ကတရားဝင်ပြောကြားခဲ့ပေမယ့်အခုချိန်အထိပြန်မဖွင့်သေးတာပါ။
"မြဝတီမှာတော့လုပ်သားတွေမရှိတော့ဘူး ကျောက်လုံးကြီးစခန်းကလဲပိတ်ထားတယ် ဒီဖက်ကလဲကျန်းမာရေးဝန်ကြီးဌာနကပထမတော့ထိုင်းဖက်ကအထောက်အထားရှိတဲ့သူတွေရောမရှိတဲ့သူတွေရောကာကွယ်ဆေးထိုးပေးပြီးပြင်ဆင်ထားတယ် ကျတော်သိရသလောက်တော့ဒီရောဂါကြောင့် တော်တော်နဲ့ပြန်ဖွင့်အုံးမှာမဟုတ်သေးဘူး"လို့ထိုင်းနိုင်ငံမဲဆောက်မြို့ခံတဦးက MLN ကိုပြောပါတယ်။
ထိုင်းနိုင်ငံအတွင်းနေ့စဥ်ရက်ဆက်ဆိုသလိုအိုမီခရွန်ကူးစက်သူတွေ့ရှိနေတဲ့အတွက်မြန်မာနယ်စပ်ဂိတ်တွေဖြစ်တဲ့မြဝတီ-မဲဆောက်၊ တာချီလိတ်-မဲ့ဆိုင်၊ ကော့သောင်း-ကချနပူရီဂိတ်တွေယခုလဝက်အတွင်းပြန်ဖွင့်နိုင်ဖို့ခက်ခဲနေအုံးမယ်လို့ထိုင်းနိုင်ငံတွင်းမြန်မာလုပ်သားအရေးကျွမ်းကျင်သူတဦးကဆိုပါတယ်။
ထိုင်းနိုင်ငံအတွင်းနိုဝင်ဘာလ၁ရက်နေ့မှယခုနှစ်ဇန်နဝါရီလ၄ရက်နေ့အထိခရိုင်ပေါင်း၅၅ခုတွင်အိုမီခရွန်ကူးစက်ခံရသူပေါင်း ၂၃၃၈ ဦးအထိရှိနေပြီလို့ထိုင်းသတင်းတွေရဲ့အဆိုအရသိရပါတယ်။
မြန်မာနိုင်ငံတွင်းမှာလဲစစ်တပ် အာဏာသိမ်းပြီးနောက်အလုပ်အကိုင်ရှားပါးမှု့တွေ စစ်ရေးပဋိပက္ခတွေကြောင့်အိမ်နီးချင်းနိုင်ငံတွေဆီမှာအလုပ်လုပ်ကိုင်ဖို့စောင့်ဆိုင်းနေသူတွေရှိသလိုတရားမဝင်လမ်းကြောင်းကတဆင့်သွားရောက်ကြတဲ့အတွက်ထိုင်းနိုင်ငံတွင်းမှာဖမ်းဆီးခံရသူတွေသောင်းဂဏန်းနီးပါးရှိနေတယ်လို့သတင်းထုတ်ပြန်ချက်တွေအရသိရပါတယ်။
