ထိုင်းနိုင်ငံအတွင်း နှစ်ရှည်လများနေထိုင် နေတဲ့​ရွှေ့ပြောင်း နေထိုင်သူ နိုင်ငံခြားသား ၅ သိန်းခန့်ကို ထိုင်းနိုင်ငံသား ဖြစ်ခွင့်ပေးဖို့   ထိုင်းအစိုးရက  သဘောတူခွင့်ပြုလိုက်တယ်လို့ ထိုင်းမီဒီယာတွေက ဖော်ပြထားပါတယ်။ 

အောက်တိုဘာလ ၂၉ ရက်က ကျင်းပတဲ့ အစိုးရအဖွဲ့အစည်းအဝေးမှာ နိုင်ငံခြားသား ၄၈၃,၀၀၀ ဦးကို ထိုင်းနိုင်ငံသားအဖြစ် အသိအမှတ်ပြုလက်ခံမယ်လို့  ဆိုပါတယ်။ 

ထိုင်းလူဝင်မှုကြီးကြပ်ရေးဝန်ကြီးဌာနရဲ့ စစ်ဆေးချက် စာရင်းများအရ ထိုင်းနိုင်ငံအတွင်း ရောက်ရှိနေတဲ့ တောင်ပေါ်တိုင်းရင်းသားလူမျိုးစုနဲ့သူတို့က မွေးဖွားလာသူတွေ၊ ထိုင်းနိုင်ငံမှာ မွေးဖွားတဲ့ နိုင်ငံမဲ့သူအရေ အတွက်ဟာ (၄၈၃၀၀၀)ရှိနေတယ်လို့သိရပါတယ်။ 

"နှစ်ရှည်နေထိုင်နေတဲ့ နိုင်ငံခြားသား တွေ ကို နိုင်ငံသား ဖြစ်ခွင့် ပေးမယ်လို့တော့ ထိုင်းအစိုးရ က ပြောတာပဲ ဘယ်တော့လဲ ဆိုတာ မသိသေးဘူး
သူတို့က ပြောတာဘဲ ရှိတာ အခုထိ ပန်းရောင် ဘတ် ကိစ္စ ​တောင် ဘယ်တော့လုပ်ပေးမယ်မသိသေးဘူး 
တကယ်လို့ နိုင်ငံသား ဖြစ်ခွင့် ရမယ်ဆိုလဲ  အောက်ခြေ အလုပ်သမားတွေ အတွက်က မျှော်လင့်ချက်နည်းပါတယ်""လို့ ထိုင်းရောက် မြန်မာနိုင်ငံသားတစ်ဦးက မှတ်ချက်ပြုပါတယ်။ 

နိုင်ငံသားအဖြစ် အသိအမှတ်ပြုမယ့်လုပ်ငန်းစဥ်နဲ့ပတ်သက်လို့ အသေးစိတ်ကို လာမယ့် တစ်လ ဒါမှမဟုတ် နှစ်လအတွင်း ထုတ်ပြန်ကြေညာပေးမယ်လို့ သိရပါတယ်။

၁၉၈၄ ခုနှစ်ကနေ ၁၉၉၉ ခုနှစ်အထိ ထိုင်းနိုင်ငံမှာ ရွှေ့ပြောင်းနေထိုင်သူ ၁၂၀,၀၀၀ ဦးခန့်၊ ၂၀၀၀ ပြည့်နှစ်ကနေ ၂၀၁၁ ခုနှစ်အထိ ထိုင်းနိုင်ငံမှာ ရွှေ့ပြောင်းနေထိုင်သူ ၂၁၅,၀၀၀ ဦးခန့်၊ ထိုင်းနိုင်ငံမှာ မွေးဖွားကြီးပြင်းတဲ့ တိုင်းရင်းသားမျိုးနွယ် ကလေးငယ် ၂၉,၀၀၀ ဦးခန့်၊ နေထိုင်ခွင့်အထောက်အထားမရှိပေမယ့် ထိုင်းနိုင်ငံမှာ မွေးဖွားလာတဲ့ ကလေးငယ် ၁၁၃,၀၀၀ ဦးခန့်၊ စုစုပေါင်း ၄၈၃,၀၀၀ ဦးခန့်ကို ထိုင်းနိုင်ငံသားအဖြစ် အသိအမှတ်ပြုပေးဖို့ အစိုးရအဖွဲ့က ဆုံးဖြတ်ခဲ့တာလို့ သိရပါတယ်။