ပဲခူးတိုင်း တောင်ငူမြို့နယ် မှာ စစ်တောင်းမြစ်ရေ ဟာ ယခင်ရက်ထက် အနည်းငယ်ပြန်ကျပေမယ့် ရေကြီးနစ်မြုပ်မှုကြောင့် ပိတ်မိနေတဲ့ ပြည်သူ တစ်ထောင်ကျော် ရှိနေသေးတယ်လို့ လူမှုကူညီရေးအသင်းတွေထံက သိရပါတယ်။
စက်တင်ဘာ ၁၃ ရက်နေ့ တိုင်းတာချက်အရ စစ်တောင်းမြစ်ရေဟာ တောင်ငူမြို့ရဲ့ စိုးရိမ်ရေမှတ် ထက် ၇ပေကျော်မှာ တည်ရှိနေပြီး စက်တင်ဘာ ၁၄ ရက်မှာတော့ စိုးရိမ်ရေမှတ်ထက် ၆ပေခွဲကျော်မှာ ရောက်ရှိနေတယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားပါတယ်။
အခုလို စိုးရိမ်ရေမှတ်ထက် ပေများစွာကျော်လွန်ရောက်ရှိနေတဲ့ အတွက် တောင်ငူမြို့နယ် အတွင်းက ကျေးရွာ ၃၀ကျော် မှာ ရေကြီးနစ်မြုပ်နေပြီး စက်တင်ဘာ ၁၂ရက်ကတည်းက ရေဘေးသင့်ပြည်သူတွေကို လူမှုကူညီရေးအသင်းအဖွဲ့တွေက ဘေးလွတ်ရာကို ကယ်ဆယ်ပေးလျက်ရှိပေမယ့် လက်ရှိအချိန်ထိ ကယ်ဆယ်ပေးရန် ကျန်ရှိတဲ့ ပြည်သူ တစ်ထောင်ကျော်အထိ ရှိနေသေးတယ်လို့ သိရပါတယ်။
""ဒီမနက် တောင်ငူမှာ ရေအနည်းငယ်ကျလာပေမယ့် ပိတ်မိနေတဲ့ ပြည်သူ တစ်ထောင်ကျော်ရှိသေးတယ် အမျိုးသမီးနဲ့ကလေးငယ်တွေ များတယ် သူတို့ဆို အစားလည်းမစားရ ရေလဲ မသောက်ရ တဲ့ အခြေနေ တွေ ဖြစ်နေတာ ကျွန်တော်တို့ လည်း သူတို့အားလုံးကို ကယ်ဆယ် နိုင်ဖို့ လုပ်ဆောင်နေပါတယ်""လို့ တောင်ငူမြို့ကလူမှုကူညီရေးအသင်းမှ တာဝန်ရှိသူတစ်ဦးကပြောပါတယ်။
ပိတ်မိနေတဲ့ ပြည်သူတွေ ကို သွားရောက် ခေါ်ဆောင်ရာမှာ ရေစီးသန်ခြင်း နဲ့ အချို့နေရာတွေ မှာ လှေနဲ့ သွားလာရတာ ခက်ခဲတဲ့ အတွက် ကယ်ဆယ်ရေး လုပ်ငန်း တွေ နှောင့်နှေးနေရတာ ဖြစ်တယ်လို့ ဆိုပါတယ်။
တောင်ငူ မြို့ပေါ်မှာ ရေဘေးကယ်ဆယ်ရေးစခန်း ၁၃ခု ဖွင့်ထားပြီး ရေဘေးသင့် ပြည်သူ တစ်သောင်းကျော် ကို ရှိတယ်လို့ သိရပါတယ်။
